Jal Rahe Hain Badan Dard Ki Dhoop Mein

Jal rahe hain badan dard ki dhoop mein Zindagi dhal gayi zakhm ke roop mein Dil mein kehram hai Teeragi aam hai Ik nigah-e-karam ae Habib-e-Khuda ﷺ Almadad Mustafa, Almadad Mustafa

Har nafas khoon ugalne laga hai bashar Ab toh mitne laga farq-e-shaam-o-sahar Aankh majboor hai Rahguzar door hai Be-khabar hai nazar, be-asar hai dua Almadad Mustafa ﷺ, Almadad Mustafa ﷺ

Jaur-e-fasl-e-khizaan hai chaman ta chaman Zer-e-dast-e-ajal, zindagi ki kiran Az karaan ta karaan Bas dhuwan hi dhuwan Az ufuq ta ufuq ranj-o-gham ki ghata Almadad Mustafa ﷺ, Almadad Mustafa

Log yun mehw hain fikr-e-dastaar mein Jaise khami na ho koi kirdar mein Aasmaan zard hai Gard hi gard hai Aadamiyat hai masroof-e-aah-o-buka Almadad Mustafa ﷺ, Almadad Mustafa ﷺ

Amn-e-insaniyat phir se mafqood hai Fikr ka aaina zang aalood hai Jism se rooh tak Seem-o-zar ki dhanak Chaak dar chaak hai ahl-e-dil ki qaba Almadad Mustafa ﷺ, Almadad Mustafa ﷺ

Phir se auhaam dil ko hain ghere huwe Shahar walon ke jungle basere huwe Tere daryoza gar Dar badar, dar badar Kaun zinda kare rasm-e-jood-o-ata? Almadad Mustafa ﷺ, Almadad Mustafa ﷺ

Kafiron ka sitam phir tere deen par? Zulm ke saaye, arz-e-Filastin par Sarzameen-e-Ajam Waqf-e-ranj-o-alam Khoon se gulbadan khitta-e-Nainawa? Almadad Mustafa ﷺ, Almadad Mustafa ﷺ

Why Screenshot When You Can Download? Get the App for Efficient Storage!

Khwab-e-manzil mein kyon qafle so gaye? Tere Miqdad-o-Maysam kahan kho gaye Kya huwe woh jari Faqr ke jauhari Muzmahil hain rutain, maatami hai fiza Almadad Mustafa ﷺ Almadad Mustafa ﷺ

Phir gudaz-e-Abu Dharr ata kar hamain Misl-e-Salman shola nawa kar hamain Dard ki raat mein Gham ki barsaat mein Hum faqiron ko bhi muskurana sikha Almadad Mustafa ﷺ, Almadad Mustafa ﷺ

Tu hai Sultan-e-jageer-e-shams-o-qamar Tu hai shahzada-e-wus'at-e-bahr-o-bar Ae Hakeem-e-Arab Tu hai Quran ba-lab Maqsad-e-amr-e-kun, waris-e- "Hal Ata" Almadad Mustafa ﷺ, Almadad Mustafa ﷺ