Yeh Dasht Yeh Darya Yeh Mehakte Hue Gulzar

Yeh dasht yeh dariya yeh mehakte hue gulzar Is aalim-e-imkaan mein abhi kuch bhi nahi tha Ik ”jalwa“ tha, so gum tha hijab-e-adam mein Ik ”aks“ tha, so muntazir-e-chashm-e-yaqeen tha

Yeh mausam-e-khushboo yeh gohar-tabi-e-shabnam Yeh raunaq-e-hangama-e-kaunain kahan thi? Gulnaar ghataon se yeh chanti hui chhaon Yeh dhoop, dhanak, daulat-e-darain kahan thi?

Yeh nakhat-e-ehsas ki maqrooz hawaein Daldari-e-ilham se mehke hue lamhaat Dosheza-e-anfas ki tasbeeh ke tewar Kis kunj-e-tasawwur mein the masroof-e-munajaat?

Shiraza-e-aaeen-e-qidam ke sabhi i’raab Be-rabti-e-ajza-e-sawalaat mein gum the Yeh rang yeh nairang yeh aurang yeh sab rang Ik parda-e-afkar-o-khayalat mein gum the

Yeh phool yeh kaliyan yeh chatakte hue ghunche Be-aab-o-hawa, tishna-e-aayaat-o-munajaat Yeh barg, yeh barkha, yeh lachakti hui shakhein Begana-e-aadaab-e-sahar be-nam-e-jazbaat

Kohsar ke jharnon se phisalti hui kirnein Ik khwab-e-musalsal ke tahayyur mein nahan thin Chup chaap fazaon mein machalti hui lehrein Mahool ke be-nutq tasawwur pe giran thin

Gham-khana-e-zulmat na koi bazm-e-charaghan Khurshid na mahtab, na anjum na kawakib Shorsh-gah-e ”kun“ thi na yeh aawaaz-e-damadam Tafreeq-e-man-o-tu na musawat-o-maratib

Hangama-e-shadi na koi majlis-e-maatam Yalghar-e-hareefan na juloos-e-gham-e-yaran Aankhon mein koi zakhm na seene mein koi chaak Anboh-e-raqiban na rukh-e-lala-e-azaran

Iflas ka ehsas na pindaar-e-zar-o-sim Bakhshish ke taqaze na yeh daryoza-gari thi Pathar ka zamana tha na sheeshe ke makan the Yeh aql ka dastoor na shorida-sari thi

Maqtool ki faryaad na aawaza-e-qatil Maqtal the na shah-rag mein lahu tha na hawas thi Darbar na lashkar na koi adl ki zanjeer Dil tha na kahin teergi-e-kunj-e-qafas thi

Rehbar the na manzil thi na raste na musafir Qandeel na jugnu na sitare na gohar the Yeh abyaz-o-aswad na abb-o-jadd na zar-o-sim Insaan the na haivan na hajar the na shajar the

Har simt musallat the tahayyur ke tilismat Jaise kisi madfan mein ho sadiyon ka koi raaz Jis tarah kisi ujre hue shehar ke saaye Ya maut ki hichki mein pighalti hui aawaaz

Jaise kisi ghar mein saf-e-maatam ki khamoshi Ya dasht-o-bayaban mein nuzool-e-shab-e-aafaat Jaise kisi kohsar pe tanha koi khaima Ya shaam-e-ghareeban ke tasarruf mein samawat

Haulay se sarakne lage hasti ke hijabaat Dheere se dhalkne laga takhleeq ka aanchal Chhan chhan ke bikharne laga, ”Shiraza-e-kun-fayakun“ Rim jhim se barasne lage ehsas ke baadal

Palke si jhapakne lagi dosheza-e-kaunain Halchal si hui paikar-e-aalam ki ragon mein Aafaq ke seene mein dhadakne lagin kirnein ”Shiraza-e-kun“ dhal bhi gaya tha fayakun mein

Har simt bikharne lagin wajdan ki kirnein Kirnon se khile rang to rangon se gulistan Bedaar hui khwab se khushbu-e-rag-e-gul Khushbu se mehakne laga daaman-e-bayaban

Daaman-e-bayaban mein nahan seena-e-barfaab Barfaab ke seene mein talatum bhi sharar bhi Aijaz-e-lab-e-kun se hue khalq-e-baik-waqt Sahra bhi, samandar bhi, kohistan bhi, shajar bhi

Phir hiddat-e-takhleeq ki shiddat se pighal kar Jaage kai toofan, tah-e-seena-e-barfaab Har mauj thi parwarda-e-aaghosh-e-talatum Har qatra ka dil, surat-e-be-khwabi-e-seemaab

Shanon pe uthaye hue baar-e-kaf-e-sailab Be-simt bhatakne lagin munh-zor hawaein Munh-zor hawaon ke thapeeron ki dhamak se Dil ban ke dhadakne lagin be-rang fazaein

Be-rang fazaon ke tahayyur ki kasak mein Panhan the shab-o-roz se aalood zamane Be-ant zamaanon ke ufaq the na hadein thin Aakhir diya tarteeb inhe dast-e-qaza ne

Phir chashm-e-tahayyur ne yeh socha ke faza mein Shadabi-e-gulzar-e-tarab, kis ke liye hai? Yeh kaun hua baais-e-takhleeq-e-do-aalam Yeh arz-o-sama kyun hain, yeh sab kis ke liye hai

Tazeen-e-meh-o-anjum-e-aflaak ka baais Hai kaun? jo khalwat ke hijabon mein chupa hai Takhleeq-e-rag-o-resha-e-kaunain ka maqsad Hai kya? jo sar-e-lauh-e-shab-roz likha hai?

Hai kis ke liye ishwa-e-Bilqees-e-tasawwur Yeh ghamza-e-rukhsar-e-jahan kis ke liye hai? Aaraish-e-khaal-o-khad-e-hasti ka sabab kaun? Yeh anjuman-e-kaun-o-makan kis ke liye hai?

Phir resham-e-anwaar ka malboos pehan kar Zahir hua ik paikar-e-sad-rang bsad naaz Nikhre kai bikhre hue rangon ke manazir Fitrat ki tajalli hui aamada-e-iaajaz

Woh paikar-e-taqdees woh sarmaya-e-takhleeq Woh qibla-e-jaan maqsad-e-takhleeq-e-do-aalam Wajdan ka mayar, meh-o-mehr ka mehwar Woh qafila-salar-e-mizaaj-e-Bani Aadam

Woh manzil-e-arbab-e-nazar, fikr ki tajseem Woh Kaaba-e-taqdeer-e-do-aalam, rukh-e-ehsas Woh bazm-e-shab-o-roz ka sultan-e-muazzam Woh raunaq-e-rukhsara-e-firoza-o-almaas

Woh shualgi-e-shama-e-haram, tabish-e-khurshid Woh aaina-e-husn-e-rukh-e-arz-o-samawat Woh, jis se rawan mauj-e-tabassum ki sabeelein Woh jis ke takallum ki dhanak chashma-e-aayaat

Woh jis ka sana-khwan daleel-e-fitrat ka takallum Hasti ke manazir, kham-e-abroo ke ishare Aafaq hain daaman ki sabahat pe tasadduq Qadmon ke nishan dhondte phirte hain sitare

Us Rahmat-e-Aalam ka qaseeda kahoon kaise? Jo mehr-e-inayaat bhi ho, abr-e-karam bhi Kya us ke liye nazr karoon jis ki sana mein Sajde mein hon alfaaz bhi, satrein bhi qalam bhi

Chehra hai ke anwaar-e-do-aalam ka saheefa Aankhein hain ke bahrain-e-taqaddus ke nageen hain Matha hai, ke wahdat ki tajalli ka waraq hai Aariz hain ke ”wal-fajr“ ki aayat ke ameen hain

Gesu hain ke ”wal-lail“ ke bikhre hue saaye Abroo hain ke qausain-e-shab-e-qadr khule hain Gardan hai ke bar farq-e-zameen auj-e-surayya Lab, surat-e-yaqoot shuaon mein dhule hain

Qad hai ke nabuwwat ke khad-o-khaal ka mayar Bazu hain ke tauheed ki azmat ke alam hain Seena hai ke ramz-e-dil-e-hasti ka khazeena Palke hain ke alfaaz-e-rukh-e-lauh-o-qalam hain

Baatein hain ke Tooba ki chatakti hui kaliyan Lehja hai ke Yazdan ki zaban bol rahi hai Khutbe hain ke sawan ke umandte hue daryaa Qiraat hai ke asrar-e-jahan khol rahi hai

Yeh daant, yeh shiraza-e-shabnam ke tarashe Yaqoot ki wadi mein damakte hue heere Sharminda-e-taab-e-lab-o-dandan-e-Paiambar ﷺ Harfe ba sana-khwani-o-khama ba sareere

Yeh mauj-e-tabassum hai ke rangon ki dhanak hai Yeh aks-e-matanat hai ke thehra hua mausam Yeh shukr ke sajde hain ke aayaat ki tanzeel Yeh aankh mein aansu hain ke ilham ki rim jhim

Yeh haath yeh kaunain ki taqdeer ke auraaq Yeh khat, yeh khad-o-khaal-e-rukh-e-mushaf-e-Injeel Yeh paon yeh mahtab ki kirnon ke maabid Yeh naqsh-e-qadam, bosa-gah-e-raf-raf-o-Jibraeel

Yeh rifat-e-dastar hai ya auj-e-takhayyul Yeh band-e-qaba hai ke shaghuft-e-gul-e-Naheed Yeh saya-e-damaan hai ke phaila hua baadal Yeh subh-e-gareeban hai ke khamyaza-e-khurshid

Yeh dosh pe chadar hai ke bakhshish ki ghata hai Yeh mohr-e-nabuwwat hai ke naqsh-e-dil-e-mahtab Rukhsar ki zau hai ke namoo subh-e-azal ki Aankhon ki malahatt hai ke ru-e-shab-e-kam-khwab

Har naqsh-e-badan itna munasib hai ke jaise Tazeen-e-shab-o-roz ke tamseel-e-meh-o-saal Malboos-e-kuhan yun shikan-aalood hai jaise Tarteeb se pehle rukh-e-hasti ke khad-o-khaal

Raftaar mein aflaak ki gardish ka tasawwur Kirdar mein shamil Bani Hashim ki ana hai Guftaar mein Quran ki sadaqat ka tayaqqun Mayar mein gardoon ki bulandi kaf-e-pa hai

Woh fikr ke khud aql-e-bashar sar-ba-gareeban Woh faqr ke thokar mein hai duniya ki bulandi Woh shukr ke Khaliq bhi tere shukr ka mamnoon Woh husn ke Yusuf ؑ bhi kare aaina-bandi

Woh ilm ke Quran ka teri itrat ka qaseeda Woh hilm ke dushman ko bhi umeed-e-karam hai Woh sabr ke Shabir ؑ teri shaakh-e-samardar Woh zabt ke jis zabt mein irfan-e-umam hai

”Aijaz-e-Maseeha“ teri bikhri hui khushbu ”Husn-e-yad-e-baiza“ teri bikhri hui khushbu ”Husn-e-yad-e-baiza“ teri dehleez ki khairaat Kaunain ki saj-dhaj teri aaraish-e-gesu

Sar-chashma-e-Kausar tere seene ka paseena Saya teri deewar ka mayar-e-aram hai Zarre teri galiyon ke meh-o-anjum-e-aflaak ”Suraj“ tere rehwar ka ik naqsh-e-qadam hai

Duniya ke salateen, tere jaroob-kashon mein Aalam ke Sikandar, teri chaukhat ke bhikhari Gardoon ki bulandi, teri paposh ki pasti Jibraeel ؑ ke shahpar tere bachon ki sawari

Dharti ke Zawi-al-Adl, tere hashia-bardar Firdous ki hoorein, teri beti ki kaneezein Kausar ho, gulistan-e-Iram ho ke woh Tooba Lagti hain tere shehar ki bikhri hui cheezein

Zahir ho to har barg-e-gul-e-tar teri khushbu Ghaib ho to duniya ko sarapa nahi milta Woh ism, ke jis ism ko lab choom lein har baar Woh jism ke suraj ko bhi saya nahi milta

Ehsas ke shualon mein pighalta hua suraj Anfaas ki shabnam mein thitharti hui khushbu Ilham ki baarish mein yeh bheege hue alfaaz Andaz-e-nigaraish mein yeh husn-e-ram-e-ahoo

Haider ؑ teri haibat hai to Hasnain ؑ tera husn Ashab wafadar to naib tere masoom Salma ؑ teri ismat hai, Khadija ؑ teri tauqeer Zahra ؑ teri qismat hai to Zainab ؑ tera maqsoom

Kis rang se tarteeb tujhe dijiye Maula? Tanveer, ke tasveer, tasawwur ke musawwir? Kis naam se imdad talab kijiye tujh se Yaseen ke Taha, ke Muzammil ke Muddassir?

Paida teri khatir hue atraf-e-do-aalam Kaunain ki wusat ka fusoon tere liye hai Har bahr ki maujon mein talatum teri khatir Har jheel ke seene mein sukoon tere liye hai

Har phool ki khushbu tere daaman se hai mansoob Har khaar mein chahat ki khatak tere liye hai Har dasht-o-bayaban ki khamoshi mein tera raaz Har shaakh mein zulfon si latak tere liye hai

”Din“ teri sabahat hai to shab teri malahatt Gul tera tabassum hai, sitare tere aansoo Aaghaz-e-baharan teri angrai ki tasveer Daldari-e-baran tere bheege hue gesu

Kohsar ke jharne, tere mathe ki shuaein Yeh qaus-e-qazah, aariz-e-rangeen ki shikan hai Yeh kahkashan dhool hai naqsh-e-kaf-e-pa ki Saqalain tera sadqa-e-anwaar-e-badan hai

Har shehar ki raunaq tere raste ki jami dhool Har ban ki udasi, teri aahat ki thakan hai Jungle ki faza teri matanat ki alamat Basti ki phaban tere tabassum ki kiran hai

Maidan tere Ba’uzar ؓ ki hukumat ke mazaafaat Kohsar tere Qanbar ؓ o Salmaan ؓ ke baseere Sahra, tere Habshi ؓ ki mohabbat ke musalle Gulzar tere Meesam ؓ o Miqdad ؓ ke dere

Kya zehan mein aaye ke tu utra tha kahan se? Kya koi bataye teri sarhad hai kahan tak? Pahunchi hai jahan par teri na’lain ki mitti Khakstar-e-Jibraeel ؑ bhi pahunche na wahan tak

Sochein to khudai teri marhoon-e-tasawwur Dekhein to khudai se har andaaz juda hai Yeh kaam bashar ka hai na Jibraeel ؑ ke bas mein Tu khud hi bata ae mere Maula ؑ ke tu kya hai?

Kehne ko to malboos-e-bashar odh ke aaya Lekin tere ahkaam falak par bhi chale hain Ungli ka ishara tha ke taqdeer ki zarbat Mahtab ke tukde teri jholi mein gire hain

Kehne ko to bistar bhi mayassar na tha tujh ko Lekin teri dehleez pe utre hain sitare Anboh-e-malaik ne hamesha teri khatir Palkon se tere shehar ke raste bhi sanware

Kehne ko to Ummi tha laqab dahr mein tera Lekin tu maarif ka gulistan nazar aaya Ik tu hi nahi sahib-e-aayaat-e-samawat Har fard tera waris-e-Quran nazar aaya

Kehne ko to faaqon pe bhi guzrein teri raatein Islam Nagar ab bhi namak-khwar hai tera Tu ne hi sikhai hai tameez-e-man-o-Yazdan Insaan ki gardan pe sada baar hai tera

Kehne ko tere sar pe hai dastar-e-yateemi Lekin tu zamane ke yateemon ka sahara Kehne ko tera faqr tere fakhr ka baais Lekin tu sakhawat ke samandar ka kinara

Kehne ko to hijrat bhi gawara tujhe lekin Aalam ka dhadakta hua dil tera makan hai Kehne ko to maskan tha tera dasht mein lekin Har zarra teri bakhshish-e-paiham ka nishan hai

Kehne ko to ik ”Ghar-e-Hira“ mein teri masnad Lekin yeh falak bhi teri nazron mein ”kaf-e-khaak“ Kehne ko to ”khamosh“ magar jumbish-e-lab se Daaman-e-Arab gard, gareeban-e-Ajam chaak

No Internet? No Problem! Get the App for Offline Lyrics!

Ae fikr-e-mukammal, rukh-e-fitrat, lab-e-aalam Ae Hadi-e-Kul, Khatm-e-Rusul, Rahmat-e-Paiham Ae waqif-e-mairaj-e-bashar, waris-e-kaunain Ae maqsad-e-takhleeq-e-zaman, husn-e-mujassam

Nasl-e-Bani Aadam ke haseen qafila-salar Anboh-e-malaik ke liye zill-e-Ilahi Paighambar-e-Firdous-e-bareen, Saqi-e-Kausar Ae manzil-e-idraak, dil-o-deeda-panahi

Ae baais-e-aaeen-e-shab-o-roz-e-khalaiq Ae halqa-e-arwah-e-muqaddas ke Paiambar ﷺ Ae tajwar-e-bazm-e-shariyat, mere Aqa Ae aarif-e-mairaj-e-bashar, sahib-e-minbar

Ae Sayyid-o-Sarkhail-o-Sarafraz-o-Sukhan-saaz Ae Sadiq-o-Sajjad-o-Sakhi, sahib-e-asrar Ae fikr-e-jahan-zaib-o-jahan-geer-o-jahan-taab Ae faqr-e-jahan-soz-o-jahan-saaz-o-jahan-daar

Ae Sabir-o-Sanna-o-Sameem wasif-e-ausaf Ae Sarwar-e-Kaunain-o-Samee-e-yam-e-aswaat Meezan-e-ana, maktab-e-pindaar-e-tayaqqun Aizaz-e-khudi, masdar-e-sad-rushd-o-hidayat

Ae Shakir-o-Mashkoor-o-Shakeel-e-shab-e-aalam Ae Nasir ؓ o Mansoor ؓ o Naseer-e-dil-e-insaan Ae Shahid ؓ o Mashhood ؓ o Shaheed-e-rukh-e-tauheed Ae Nazir ؓ o Manzoor ؓ o Nazeer-e-lab-e-Yazdan

Ae Yusuf ؑ o Yaqoob ؑ ki umeed ka mehwar Ae baab-e-munajaat-e-dil-e-Yunus ؑ o Idrees ؑ Ae Nooh ؑ ki kashti ke liye sahil-e-taskeen Ae qibla-e-haajaat-e-Sulaiman ؑ Shah-e-Bilqees ؑ

Ae Wali-e-Yasrab meri faryaad bhi sun le Ae waris-e-kaunain mein lab khol raha hoon Zakhmi hai zaban khama-e-dil khoon mein tar hai Shair hoon magar dekh main sach bol raha hoon

Tu ne to mujhe apne maarif se nawaza Lekin main abhi khud se shanasa bhi nahi hoon Tu ne to ata ki thi mujhe daulat-e-irfan Lekin main jahalat ke andheron mein ghira hoon

Bakhshish ka samandar tha tera lutf-o-karam bhi Lekin main tera lutf-o-karam bhool chuka hoon Bikhri hai kuch aise shab-e-teera ki siyahii Main shualgi-e-shama-e-haram bhool chuka hoon

Tu ne to mujhe kufr ki pasti se nikala Main phir bhi raha qamat-e-ilhaad ka paband Tu ne to mere zakhm ko shabnam ki zaban di Main phir bhi tadapta hi raha surat-e-aspand

Tu ne to mujhe nukta-e-sheereen bhi bataya Main phir bhi raha mo’taqid-e-talkh-kalami Tu ne to mera daagh-e-jabeen dho bhi diya tha Main phir bhi raha said-o-sana-khwan-e-ghulami

Tu ne to musallat kiya aflaak pe mujh ko Main phir bhi raha khaak ke zarron ka pujari Tu ne to sitare bhi nichawar kiye mujh par Main phir bhi raha teergi-e-shab ka shikari

Tu ne to mujhe dars-e-musawat diya tha Main phir bhi man-o-tu ke marahil mein raha hoon Tu ne to juda kar ke dikhaya haq-o-batil Main phir bhi tameez-e-haq-o-batil mein raha hoon

Tu ne to kaha tha ke zameen sab ke liye hai Main ne kai khitton mein ise baant diya hai Tu ne jise thokar ke bhi qabil nahi samjha Main ne usi kankar ko gohar maan liya hai

Tu ne to kaha tha ke zamane ka Khudawand Insaan ke khayalon mein kabhi aa nahi sakta Lekin main jahalat ke sabab sirf yeh samjha Woh kaisa Khuda? jis ko bashar pa nahi sakta

Tu ne to kaha tha ke woh ooncha hai khird se Main ne yahi chaha utar aaye woh khird mein Tu ne to kaha tha ke ”Ahad“ hai woh azal se Main ne use dhunda hai sada ”hiss-o-adad“ mein

Ab yeh hai ke duniya hai meri teera-o-tareek Saya gham-e-dauran ka muheet-e-dil-o-jaan hai Har lamha udasi ke tasarruf mein hai ehsas Ta had-e-nazar khauf-e-musalsal ka dhuan hai

Sahra-e-gham-o-yaas mein phaili hai kadi dhoop Kuch lams-e-kaf-e-mauj-e-saba tak nahi milta Be-ant sarabon mein kahan jaada-e-manzil? Apna hi nishan-e-kaf-e-pa tak nahi milta

Aasaab shikasta hain to chalni hain nigahain Ehsas-e-baharan na gham-e-fasl-e-khizan hai Aandhi ki hatheli pe hai jugnu ki tarah dil Shualon ke tasarruf mein rag-e-ghuncha-e-jaan hai

Har simt hai ranj-o-gham-o-aalaam ki baarish Seene mein har ik saans bhi neeze ki ani hai Ab aankh ka aaina sambhaloon mein kahan tak Jo ashk bhi behta hai woh heere ki kani hai

Ahbaab bhi a’daa ki tarah teer-ba-kaf hain Ab maut bhatakti hai saf-e-chara-garan mein Sansaan hai maqtal ki tarah shehar-e-tasawwur Sehmi hui rehti hai faghan, khaima-e-jaan mein