Nikhare Hue Kirdaar Ka

Nikhray huay kirdar ka Quran hai Sajjadؑ Insaan ki taqdees ka sultan hai Sajjadؑ Sar-chashma-e-deen, azmat-e-imaan hai Sajjadؑ Islam ki tareekh ka unwaan hai Sajjadؑ

Yeh shehr-e-faza'il hai masaib ka jahan hai Takbeer-e-nabuwwat hai imamat ki azaan hai

Har daur mein ehsas ki meraj hai Sajjadؑ Ghairat ka shehanshah hai sartaj hai Sajjadؑ Mazloom ki aankhon mein makeen aaj hai Sajjadؑ Kab tere mere zikr ka mohtaj hai Sajjadؑ?

Download Lyrics & Access Offline - Install Our App Now!

Jab tak hai jahan mein haq-o-batil ka fasana Sajjad ke sajdon ko na bhoolay ga zamana

Sajjad ki aahat se larazti rahi shahi Sajjad ki aawaz hai batil ki tabahi! Sajjad ke be-tegh reh-e-haq ka sipahi Sajjad hai Shabbirؑ ki azmat ki gawahi

Sajjad ki haibat se ajal dol rahi hai Zanjeer ki ek ek kari bol rahi hai

Sajjad ki surat hai ke Quran ki surat Sajjad ki har saans shariat ki zaroorat Sajjad se takrayi jo batil ki kudurat Be-naam-o-nishan ho ke rahi gard ki surat

Jab zulm kabhi dahr ko barbad kare ga! Sajjad ko islam bahut yaad kare ga

Aawaz-e-salasil se kayi hashr jagaye Tareek zameeno mein mah-o-mehr ugaye! Ashkon ki shuaon se dhulay shaam ke saaye Chup reh ke har ek jaur ke sab naqsh mitaye!

Sajjad ne Islam ki taqdeer jaga di Qaidy tha magar zulm ki bunyad hila di

Aye Adam-e-Sadat-o-nishan-e-rukh-e-Hasnainؑ Sultan-e-dil-e-khak nasheena shah-e-saqalain Abroo mein hai aijaz numa ayyat-e-qausain Milti hai tere dars se hamain daulat-e-darain

Amboh-e-alam mein bhi munajat-e-Samad hai Tu zabt ka mayar, tu hi sabr ki had hai

Aye qafila salar-e-ghareeban, mere sardar Tareekh ka chehra hai tere khoon se gulnar Ham martaba-e-arsh-e-mu'alla tera kirdar! Haq tera saheefa hai, sadaqat tera mayar

Dunya hai fida chand ki adna si jhalak par Maula, yeh tere tauq ka tukra hai falak par

Hai subh ka tara ke tera aakhri aansu Yeh qaus-e-qazah hai ke tera sayat-e-abroo Hai shaam-e-ghareeban ke tera noha-e-gesoo Har mausam-e-gul tere paseenay ki hai khushboo

Shabnam ne jo patton ke kabhi chaak siye hain Phoolon ne tere zakhm bahut yaad kiye hain