Ilham Ki Rim Jhim

Ilham ki jham jham kahin bakhshish ki ghata hai Yeh dil ka nagar hai ke Madine ki faza hai

Saanson mein mehakti hain munajat ki kaliyan Kaliyon ke katoron pe tera naam likha hai

Aayaat ki jhurmat mein tere naam ki masnad Lafzon ki angoothi mein nagina sa jura hai

Khursheed teri raah mein bhatakta hua jugnoo Mahtaab tera reza naqsh-e-kaf-e-pa hai

Wailail tere saaya-e-gaisoo ka tarasha Walasr teri neem nigahi ki ada hai

Rag rag ne sameti hai tere naam ki faryaad Jab jab bhi pareshan mujhe duniya ne kiya hai

Khaliq ne qasam khayi hai us shahar-e-amaan ki Jis shahar ki galiyon ne tujhe wird kiya hai

Free Up Space - Get Lyrics Without Bulky Screenshots!

Ek baar tera naqsh-e-qadam choom liya tha Ab tak yeh falak shukr ke sajde mein jhuka hai

Sooraj ko ubharne nahi deta tera Habshi Ye zar ko Abuzar teri bakhshish ne kiya hai

Saqalain ki qismat teri dehleez ka sadqa Aalam ka muqaddar tere hathon pe likha hai

Utre ga kahan tak koi aayaat ki teh mein Quran teri khatir abhi masroof-e-sana hai

Ab aur bayaan kya ho kisi se teri midhat Yeh kam to nahi hai ke tu mehboob-e-Khuda hai

Ae Gumbad-e-Khizra ke makeen meri madad kar Ya phir yeh bata kaun mera tere siwa hai

Bakhshish teri aankhon ki taraf dekh rahi hai Mohsin tere darbaar mein chup chaap khara hai