Humare Dil Ke Aina Mein

Hamare dil ke aaina mein hai naqsha Muhammad ﷺ ka Hamari aankh ki putli mein hai jalwa Muhammad ﷺ ka

Khas-o-khashak se badtar hai begana Muhammad ﷺ ka Use hoshyar samjho jo hai deewana Muhammad ﷺ ka

Tumhare hi liye tha ae gunahgaro siyah-karo Woh shab bhar jaagna aur raat bhar rona Muhammad ﷺ ka

No Internet? No Problem! Get the App for Offline Lyrics!

Jigar hota hai tukre tukre jis dam yaad aata hai Woh shab bhar jaagna aur raat bhar rona Muhammad ﷺ ka

Ghulamane-Muhammad ﷺ ke saron se bare-isyaan ko Ura le jaega ek aan mein jhonka Muhammad ﷺ ka

Siyah hain namai-aamaal apne garche ae Zahid Magar kaafi hai dhulne ke liye chheenta Muhammad ﷺ ka

Nida hogi yeh mahshar mein gunahgaro na ghabrao Woh dekho abre-rahmat jhoom kar utha Muhammad ﷺ ka

Agarcha abidon ke paas samane-ibadat hai Gunahgaron ko kaafi hai faqat eema Muhammad ﷺ ka

Lahad ka khauf kyun ho roze-mahshar ka ho kya khatka Liye jata hoon dil par likh ke main tughra Muhammad ﷺ ka

Khuda ke samne peshi hui jis dam to keh doon ga Bura hoon ya bhala lekin hoon main banda Muhammad ﷺ ka

Ta'ajjub kya agar munh pher le jannat se shaidai Ke hai rashke-bahare-khuld har koocha Muhammad ﷺ ka

Koi jaega dozakh ko koi jannat mein pahunche ga Madine ki taraf daure ga deewana Muhammad ﷺ ka

Ilahi is tane-khaki mein jab tak jaan baqi hai Rahe dil mein Ahad aur wirde-lab kalma Muhammad ﷺ ka

Nikalein rooh tan se Qabiz-ul-Arwah jab aakar Khudaya wirde-lab us waqt ho kalma Muhammad ﷺ ka

Huwal Mu'ti wa inni qasim se saaf zahir hai Bate ga hashr tak konain mein bara Muhammad ﷺ ka

Nahin mauqoof kuch un ki ata is ek aalam par Mile ga hashr mein bhi dekhna sadqa Muhammad ﷺ ka

Jameel Qadri mushkil hai midhat khatm kar is par Ke Haq ke baad bala sab se hai rutba Muhammad ﷺ ka

Main hoon banda Raza ka aur Raza Ahmed ke banda hain Jameel Qadri main yun hua banda Muhammad ﷺ ka