Hai Zikr Mere Lab Par

Hai zikr mere lab par har subah-o-shaam tera Main kya hoon saari khilqat leti hai naam tera

Har cheez ka tu naazir aur har makaan mein haazir Zahir mein hai agarcheh Taibah maqam tera

Har aankh dekhti hai tere hi rukh ka jalwa Har kaan sun raha hai pyare kalaam tera

Tu naib-e-Khuda hai mehboob-e-Kibriya hai Hai mulk mein Khuda ke jaari nizam tera

Maalik tujhe banaya makhlooq ka Khuda ne Is waaste likha hai har shay pe naam tera

Tere Khuda ne tujh ko qudrat har ek ata ki Ik mojiza hai pyare yuhyil-izaam tera

Butta hai do-jahan mein tere hi ghar se baara Lena hai sab ka shewa dena hai kaam tera

Aye lambe lambe hathon se bheek dene wale Mujh ko bhi koi tukda hai jood-e-aam tera

Instant Access to Thousands of Lyrics - Tap to Install!

Aye pyari pyari zulfon wale nazar idhar bhi Muddat se tak raha hai tujh ko ghulam tera

Aye mujrimon ko apne daaman mein lene wale Sab aasra takenge roz-e-qayam tera

Noorani jaaliyon mein tashreef rakhne wale Tadpa kare kahan tak Hindi ghulam tera

Faryad sunne wale lillah shaad karde Bekas tadap rahe hain le le ke naam tera

Kya khoob ho jo mujh se aakar saba yeh keh de Pohancha diya hai main ne Shah ko salam tera

Dast-e-ata mein tere rehmat ki kunjiyan hain Butta hai sab ko sadqa har subah-o-shaam tera

Ins-o-malak ko kya ho maloom teri rifat Fehm-o-qiyas se hai bahar maqam tera

Chauthe falak pe Isa aur Toor par the Moosa Kursi-o-arsh se hai bala maqam tera

Tu peshwa hai sab ka sab muqtadi hain tere Aqsa mein kaise banta koi imam tera

Rasta hai arsh-o-kursi aur la-makan makan hai Makkah hai tera maulid Taibah maqam tera

Dushman tera isi dam mehboob ho Khuda ka Gar sidq-e-dil se keh de main hoon ghulam tera

Ya Shah tera munkir mardood-e-Izadi hai Woh hai Khuda ka banda jo hai ghulam tera

Dushman ghataein jitni izzat badhe gi utni Manzoor hai Khuda ko ehtram tera

Raaton ko rote rote darya bahaye tu ne Bakhshish ko aasiyon ki yeh ehtimam tera

Jab qabr mein farishtey poochein ke tu hai kis ka Nikle meri zaban se Ya Shah naam tera

Dushwar go bahut hai rah-e-sirat lekin Ik pal mein tay karenge hum le ke naam tera

Woh din Khuda dikhaye tujh ko Jameel-e-Rizwi Ho jaye un ke dar pe qissa tamam tera