Hai Konain Ke Sar Pe

Hai kaunain ke sar pe rahmat Nabi ki Kare phir na kyun naaz ummat Nabi ki

Na kyunkar rahe har jagah sunniyon par Khuda ka karam aur inayat Nabi ki

Hamein jayenge khuld mein sab se pehle Nabi ke hain hum aur jannat Nabi ki

Banaye gaye hum shafa’at ki khatir Hamare liye hai shafa’at Nabi ki

Wohi lutf payenge roz-e-qayamat Jo rakhte hain duniya mein ulfat Nabi ki

Qayamat ka din sirf is waste hai Ke dikhlayein us roz izzat Nabi ki

Yeh Rizwan ko hukm-e-Khuda hai ke pehle Chali jaye jannat mein ummat Nabi ki

Faqat ek aalam nahin un pe shaida Khuda ko bhi pyari hai surat Nabi ki

Woh farmate hain Man Ra’ani Ra’al Haqq Kuch aisi banayi hai surat Nabi ki

Chale jayenge khuld mein zahd wale Gunahgar dekhenge surat Nabi ki

Zamana hai Shah-e-Arab ka bhikhari Do aalam mein bat-ti hai daulat Nabi ki

Na kyun sabz gumbad pe aalam ho qurbaan Ke is mein bani pyari turbat Nabi ki

Ajab jaliyan hain sunahri sunahri Ajab pyari pyari hai turbat Nabi ki

Na lagta tha Sidra pe Jibreel ka dil Gawara na thi un ko furqat Nabi ki

Farishton mein afzal kiya yun Khuda ne Ke karte the Jibreel khidmat Nabi ki

Bulaya Khuda ne unhein lamakan mein Hui Arsh-e-A’azam pe dawat Nabi ki

Na hoga koi ba’ad un ke payambar Batati hai mohr-e-nabuwwat Nabi ki

Sahaba hain sab misl-e-anjum darakhshan Safina hai ummat ka itrat Nabi ki

Abu Bakr ki shaan-o-izzat to dekho Rahi ba’ad rehlat bhi qurbat Nabi ki

Doshanba ko afzal kiya yun Khuda ne Ke is mein hui hai wiladat Nabi ki

Ba-hukm-e-ahadees iman yeh hai Ke ho sab se barh kar mohabbat Nabi ki

Hai tasdeeq-e-wahdaniyat juzv-e-iman Magar asl-e-iman hai ulfat Nabi ki

Kitab-e-Ilahi yeh farma rahi hai Hai ta’at Khuda ki ita’at Nabi ki

Nabi ke muhib ho to mehboob-e-Rabb ho Khuda ko hai itni mohabbat Nabi ki

Kisi ki kisi ko nahin hai na hogi Khuda ko hai jitni mohabbat Nabi ki

Woh aayi woh aayi woh aayi woh aayi Shafa’at shafa’at shafa’at Nabi ki

Na ghabrao bandu na ghabrao bandu Yeh kehti hai hum se wajahat Nabi ki

Ra’ani Ra’al Haqq yeh farma raha hai Hai ru’yat Khuda ki ziyarat Nabi ki

Damak kar chamak kar yeh kehti hai surat Ke jalwa Khuda ka hai tal’at Nabi ki

Mila jis ko jo kuch yahin se mila hai Hai mashhoor-e-aalam sakhawat Nabi ki

Nahin hoti kam kharch karne se kuch bhi Ajab barhti daulat hai ni’amat Nabi ki

Khuda ne diya hai magar un ke hathon Ata to Khuda ki hai qismat Nabi ki

Azab-e-Khuda munkiron par utarta Na hoti agar aam rahmat Nabi ki

Iwaz zulm ke dushmanon ko dua di Jahan se nirali hai aadat Nabi ki

Ishare se ek chand ke do banaye Hai ta-Arsh naafiz hukoomat Nabi ki

Offline Lyrics Anytime, Anywhere - Download the App Today!

Mah-o-mehr arz-o-sama arsh-o-kursi Nahin janta kaun qudrat Nabi ki

Gire aake ashjar qadmon pe un ke Jamadat ne di shahadat Nabi ki

Dam-e-naz’a marqad mein roz-e-qayamat Khudaya muyassar ho qurbat Nabi ki

Na chhora kisi ko bhi dast-e-ata ne Mila sab ko sab kuch badolat Nabi ki

Adu ke jalane ko ae sunniyo tum Karo jis se zahir ho shaukat Nabi ki

Jameel apne iman ka iman yeh hai Ke ho dil mein khalis mohabbat Nabi ki