Habib e Khuda Arsh Par

Habib-e-Khuda Arsh par jaane waale Woh ik aan mein ja ke phir aane waale

Khuda ko in aankhon se dekh aane waale Woh tafseel se sair farmaane waale

Woh Aqsa mein mairaj ki shab pahunch kar Imamat nabiyon ki farmaane waale

Woh ummi hain aise ki fazl-e-Khuda se Hain ilm-e-mughibat sikhlane waale

Unhein ki hai aalam mein naafiz hukumat Yahi hain darakhton ke bulwane waale

Ishare se un ke qamar ke huye do Yeh hain dam mein suraj ko lautane waale

Unhein ka laqab hai shafee-e-ghulaman Yeh hain ahl-e-isyan ke bakhshane waale

Raha un ke maathe shafa'at ka sehra Yahi hain gunahon ke bakhshane waale

Yahi toh hain har qism ki naimaton ke Zamaane mein taqseem farmaane waale

Na kyonkar ghani dil hon un ke ki jo hain Hazoor-e-Nabi haath phailane waale

Jo chaho woh maango jo maango woh paao Nahin hain yeh inkar farmaane waale

Tamanna kuja saltanat chhodte hain Tere dar pe jholi ko phailane waale

Na kyon chamkein kaunain mein badr ho kar Tere naam-e-aqdas pe mit jaane waale

Pahunchte hain maqsood ko apni jaldi Qadam rah-e-Maula mein daudane waale

Ajal sar pe hai tez chal su-e-Taibah Madine ke raste mein sustane waale

Karein aake nazara-e-sabz gumbad Jo ooncha falak ko hai batlane waale

Hamare hi hain muntazir hoor-o-ghilman Hain pehle hamein khuld mein jaane waale

No More Screenshots! Save Storage with Our Lyrics App!

Hamein naaz hai dasht-e-Taibah pe Zahid Jo hain aap jannat pe itrane waale

Gul-e-khuld se badloon mein khar-e-Taibah Are wah shabash lalchane waale

Main mujrim sahi par Nabi ke karam se Na rokenge mujh ko kahin thaane waale

Hai saya-fagan sar pe parcham Nabi ka Nahin mehr-e-mahshar se ghabrane waale

Munadi kahe ga na ghabrayein mujrim Ab aate hain ummat ke bakhshane waale

Gunahgar kya balki hain ambiya bhi Teri zaat par fakhr farmaane waale

Jaga de Khudara mera bakht-e-khufta Ghulamon ki qismat ko chamkane waale

Jo aalam ko karte hain roshan mah-o-khor Woh hain tere zarron se sharmane waale

Idhar bhi koi boond gesu ka sadqa Mere abr-e-rehmat ke barsane waale

Jo achhon ki qismat mein hai jaam tera Badon ko bhi ik boond maikhane waale

Hai jin ka wazifa Aghithni Habibi Yeh hain un ki imdad farmaane waale

Jo duniya mein hain munkir-e-istiaanat Woh honge qayamat mein pachhtane waale

Adab dil se laazim hai aye ahl-e-mehfil Habib-e-Khuda hain yahan aane waale

Jalein aur tauseef-e-sarkar sun kar Jahannam ki aatish mein jal jaane waale

Sunata hai Quran Mootu ka muzhda Jalein ghaiz mein apne jal jaane waale

Bane ga tu beshak jahannam ka kunda Are naib-e-Haq se phir jaane waale

Jo kehte hain un ko na tha ilm bilkul Woh beshubha dozakh mein hain jaane waale

Dua hai ki ahbab mein ho yeh charcha Jameel ab Madine ko hain jaane waale

Wahin par rahon aur wahin jaan nikle Madine ke hon log dafnane waale