Ghair Mumkin Hai Sana e Mustafa

غیر ممکن ہے ثنائے مصطفیٰ خود ہی واصف ہے خدائے مصطفیٰ

دِل میں دے یارب وِلائے مصطفیٰ اور ہو سینہ میں جائے مصطفیٰ

تیرے پیارے کا میں دیوانہ بنوں یہ دُعا ہے اے خدائے مصطفیٰ

مصطفیٰ ہیں ساری خلقت کے لیے ساری خلقت ہے برائے مصطفیٰ

ڈھونڈتے ہیں سب رضا اللہ کی چاہتا ہے حق رضائے مصطفیٰ

کیا نسیمِ خلد خوش آئے اسے جس کے سر میں ہے ہوائے مصطفیٰ

رِزق کیا ہر چیز کے قاسم ہیں وہ دَین رب کی ہے عطائے مصطفیٰ

رہ گئے سدرہ پہ جبریلِ امیں عرش سے بھی پار جائے مصطفیٰ

دشتِ طیبہ میں بہارِ خلد ہے جانِ جنت ہے سرائے مصطفیٰ

منتظر ہیں جنتیں اُس کے لیے وِرد ہے جس کا ثنائے مصطفیٰ

میری اُمت میری اُمت بخش دے ہے یہی ہر دَم دُعائے مصطفیٰ

روزِ محشر اُن کے بندوں کے لیے راہبر ہوگی ضیائے مصطفیٰ

حکم حق ہوگا کہ جائے سب سے قبل خلد میں ہر ہر گدائے مصطفیٰ

پل سے گزریں ان کے بندے بے خطر رَبِّ سَلِّم ہے صدائے مصطفیٰ

یوں پکارے گا مُنادی حشر میں عاصیوں مژدہ وہ آئے مصطفیٰ

اپنی اُمت کو ُچھڑانے کے لیے حشر میں تشریف لائے مصطفیٰ

جاں کنی کے وقت اَزراہِ کرم چہرۂ اَنور دِکھائے مصطفیٰ

پوچھتے کیا ہو فرشتو قبر میں بندئہ حق ہوں گدائے مصطفیٰ

قبر و محشر کا یہی ہے اِک جواب بندۂ حق ہوں گدائے مصطفیٰ

مہرِ محشر مجھ پہ ہوجائے گا سرد بندۂ حق ہوں گدائے مصطفیٰ

کیوں ڈرائے گی مجھے نارِ جحیم بندئہ حق ہوں گدائے مصطفیٰ

دو قدم میں ہوگی طے راہِ صراط بندۂ حق ہوں گدائے مصطفیٰ

زُہد و طاعت کچھ نہیں ہے میرے پاس بندئہ حق ہوں گدائے مصطفیٰ

روزِ محشر دھوپ میں ہوں گے عدو ہم گدا زیرِ ِلوائے مصطفیٰ

چاہتا ہوں دل سے احمد کی رضا مجھ سے راضی ہو رضائے مصطفیٰ

ہے تمنائے جمیلِؔ قادری سر ہو میرا اور پائے مصطفیٰ