Fikr Aasfal Hai Meri

Fikr-e-asfal hai meri martaba-e-aala tera Wasf kya khaak likhe khaak ka putla tera

Toor par hi nahi mauqoof ujala tera Kaun se ghar mein nahi jalwa-e-zaiba tera

Har jagah zikr hai ai Wahid-o-Yakta tera Kaun si bazm mein roshan nahi ikka tera

Phir numayan jo sar-e-Toor ho jalwa tera Aag lene ko chale aashiq-e-shaida tera

Kheera karta hai nigahon ko ujala tera Kijiye kaun si aankhon se nazara tera

Jalwa-e-yaar nirala hai yeh parda tera Ke gale mil ke bhi khulta nahi milna tera

Kya khabar hai ke al-arshe ke maani kya hain Ke hai aashiq ki tarah arsh bhi joya tera

Arini go-e-sar-e-Toor se poochay koi Kis tarah ghash mein girata hai tajalli tera

Paar utarta hai koi gharq koi hota hai Kahin payab kahin josh mein darya tera

Bagh mein phool hua sham-e-bana mehfil mein Josh-e-nairang dar-aaghosh hai jalwa tera

Naye andaaz ki khalwat hai yeh ai parda-nasheen Aankhein mushtaq rahein dil mein ho jalwa tera

Shah-nasheen tootay huye dil ko banaya usne Aah ai deedah-e-mushtaq yeh likha tera

Saat pardon mein nazar aur nazar mein aalam Kuch samajh mein nahi aata yeh muamma tera

No Internet? No Problem! Get the App for Offline Lyrics!

Toor ka dher hua ghash mein paray hain Moosa Kyun na ho yaar ke jalwa hai yeh jalwa tera

Chaar azdad ki kis tarah girah bandhi hai Naakhun-e-aql se khulta nahi uqda tera

Dasht-e-Aiman mein mujhe khaak nazar aaye ga Mujh mein ho kar nazar aata nahi jalwa tera

Har sahar naghma-e-murghan-e-nawasanj ka shor Goonjta hai tere ausaaf se sehra tera

Wehshi-e-ishq se khulta hai tu ai parda-e-raaz Kuch na kuch chaak-e-gareban se hai rishta tera

Sach hai insaan ko kuch kho ke mila karta hai Aap ko kho ke tujhe paye ga joya tera

Hain tere naam se aabadi-o-sehra aabad Shehr mein zikr tera dasht mein charcha tera

Barq-e-deedar hi ne toh yeh qayamat tori Sab se hai aur kisi se nahi parda tera

Aamad-e-hashr se ik eid hai mushtaqon ko Isi parda mein toh hai jalwa-e-zaiba tera

Saaray aalam ko toh mushtaq-e-tajalli paya Poochne jaiye ab kis se thikana tera

Toor par jalwa dikhaya hai tamannai ko Kaun kehta hai ke apnon se hai parda tera

Kaam deti hain yahan dekhiye kis ki aankhein Dekhne ko toh hai mushtaq zamana tera

Maikada mein hai tarana toh azaan masjid mein Wasf hota hai naye rang se har ja tera

Chaak ho jayen ge dil jaib-o-gareban kis ke De na chupne ki jagah raaz ko parda tera

Be-nawa muflis-o-mohtaj-o-gada kaun ke main Sahib-e-jood-o-karam wasf hai kiska tera

Aafreen ahl-e-mohabbat ke dilon ko ai dost Ek kooze mein liye baithe hain darya tera

Itni nisbat bhi mujhe donon jahan mein bas hai Tu mera maalik-o-maula hai main banda tera

Ungliyan kaanon mein de de ke suna karte hain Khalwat-e-dil mein ajab shor hai barpa tera

Ab jamata hai Hasan us ki gali mein bistar Khoobruyon ka jo mehboob hai pyara tera