Farogh e Waqt Ke Hai Tera

Farogh-e-waqt keh hai tera rahro ab bhi Muheet-e-asr tere ishq ki hai ziya ab bhi

Unhi ﷺ ke dar pe giro jis tarah se ho ab bhi Ke ek saans ki fursat hai dosto ab bhi

Tere wujood se hai kainaat husn-e-shuaar Tere junoon mein anasir hain madh-go ab bhi

Yeh kainaat to kya la-makaan bhi wajd mein hai Nihaal-e-Sidra pe hai koi naat-go ab bhi

Woh noor, sall-e-ala, sa'at-e-dua-e-Hira Jabeen-e-aakhir-e-shab par hai jis ki ziya ab bhi

Saba ke haath mein bu-e-gul-e-Madinah hai Saba ke haath se khairaat maang lo ab bhi

Saba Madine se aayi hai roshni le kar Charagh-e-dil ko saba aashna karo ab bhi

Huzoor ﷺ aap ki ummat ke kaarwan ki khair Ke raahzan hain nihan ban ke rahro ab bhi

Never Be Without Your Favorite Lyrics - Get the App for Offline Access!

Faseel-e-shehr pe likha hai garcha kal ka azaab Dar-e-najaat khula hai sitam-garo ab bhi

Naveed-e-husn-e-muqaddar hai khufta bakhton ko Huzoor ﷺ baant rahe hain karam, garo ab bhi

Ik ummati keh nadamat mein mar gaya hai Huzoor ﷺ Karam ki bheek mile, iltifat ho ab bhi

Hawa-e-naat hai gul-rang mausamon ki naqeeb Dar-e-sukhan pe khadi hai bahaar-e-nau ab bhi

Huzoor ﷺ qatre ko dariya ki wus'atein den ge Gada-e-koocha-e-rehmat, sada karo ab bhi

Yeh roshni si jo baaqi hai kasa-e-sar mein Kuch is tarah ho keh sarf-e-kitaab ho ab bhi

Nidhaal kar gaya toofaan-e-rang-o-boo mujh ko Ae Shah-e-faqr! tanaffus ujaal do ab bhi

Gham-e-raza-e-Nabi ﷺ ki thi chaudhwin kal raat Hujoom-e-shauq hai palkon pe mehv-e-ziya ab bhi

Aziz ؔ tootne wala hai ab hisaar-e-badan Wujood waqf-e-dar-e-Mustafa ﷺ karo ab bhi