Do Alam Mein Roshan Hai

Do aalam mein roshan hai ikka tumhara Hawa la-makaan tak ujala tumhara

Na kyun gaaye bulbul tarana tumhara Ke paati hai har gul mein jalwa tumhara

Zameen waale kya jaanein rutba tumhara Hai ooncha falak se pharera tumhara

Padha be-zabaanon ne kalma tumhara Hai sang-o-shajar mein bhi charcha tumhara

Chhudaye ga gham se ishara tumhara Utare ga pul se sahara tumhara

Tumhein ho jawab-e-sawaalat-e-mahshar Tumhein ko pukare ga banda tumhara

Fa-tarza ki yeh pyaari pyaari sada hai Ke hoga qayamat mein chaha tumhara

Mere paas bakhshish ki mohri sanad hai Yeh kehta hai khat-e-Shafee-a tumhara

Phirein kis liye tishna kaamaan-e-mahshar Hai labrez rehmat ka darya tumhara

Bahut khush hain ushshaq jab se suna hai Qayamat mein hoga nazara tumhara

Nahi hai agar zuhd-o-taat toh kya gham Waseela toh laya hoon Maula tumhara

Ho tum haakim-o-faateh-e-baab-e-rehmat Ke hai wasf Inna Fatahna tumhara

Amal poochay jaatay hain Sarkar aao Kahein darr na jaaye nikamma tumhara

Jo anbaar-e-isyaan hain sar par toh kya gham Bahaday ga ik dam mein ahla tumhara

Daray aaftab-e-qayamat se kyunkar Jo banda huwa mere Aaqa tumhara

Banaya tumhein Haq ne mukhtar-o-haakim Woh kya hai nahi jis pe qabza tumhara

Kiya Haq ne bahr-e-kamalaat tum ko Na paya kisi ne kinara tumhara

Muyassar kisi ko nahi aisi rif-at Ke jaisa huwa paya bala tumhara

Rafa-na ka jalwa dikhane ko Haq ne Likha arsh par naam-e-wala tumhara

Qabail ke hissay kiye jab Khuda ne Kiya sab se aala qabeela tumhara

Azaanon mein khutbon mein shaadi-o-gham mein Gharaz zikr hota hai har ja tumhara

Yeh farsh-e-zameen hai tumhari hi khatir Bana hai sama shamiyana tumhara

Munawwar huwa aasman-e-risalat Ujala hai aisa dil-aara tumhara

Bharay is mein asraar-o-ilm-e-do-aalam Kushada kiya Haq ne seena tumhara

Bahukm-e-Khuda tum ho majood har ja Bazahir hai Taiba thikana tumhara

Tumhari sifat Haq ne farmayi shahid Har ik ja hai majood jalwa tumhara

Kisi ja hai Taha-o-Yaseen kahin par Laqab hai Siraajan Muneera tumhara

Jise Haq ke deedar ki aarzu ho Woh dekhey meri jaan chehra tumhara

Khuda hum ko bakhshay woh chashm-e-Khuda been Rahay kuch na parda hamara tumhara

Kiya tum ko noor-e-mujassam Khuda ne Zameen par nahi padta saya tumhara

Kamalon ka makhzan jamalon ka gulshan Khuda ne banaya gharana tumhara

Dil-e-paak bedaar aur chashm-e-khufta Nirala tha aalam mein sona tumhara

Khuda ne kiya apne pyare se wada Woh pyara hamara jo pyara tumhara

Wahi hai Khuda ki qasam banda-e-Haq Huwa jo bhi duniya mein banda tumhara

Sahaba se taqdeer walon ke qurbaan Hai paya jinhon ne zamana tumhara

Shab-e-wasl mein anbiya-o-malak ne Padha aasmanon pe khutba tumhara

Gumi aql-e-konain raaz-e-dana mein Samajh mein na aaya muamma tumhara

Mubaddal huay anbiya ke sahayif Muharraf na hoga saheefa tumhara

Huwa kufr kafoor phaila ujala Qadam jab huwa zaib-e-duniya tumhara

Jo abd-us-sanam thay huay but-shikan woh Suna jab nubuwwat ka dawa tumhara

Muqaddar mein tha jin ke imaan lana Woh foran bana dil se banda tumhara

Raza-at ke ayyam mein yeh hukumat Ke tha qurs-e-mah ik khilona tumhara

Shah-e-deen tumhari wiladat ke baa-is Hai jumma se afzal doshanba tumhara

Buton se kiya paak qibla banaya Hai mamnoon-o-shakir yeh Kaaba tumhara

Bhala kaun Kaaba ko Kaaba samajhta Jo Shaha na hota Madina tumhara

Jamadat ne di tumhari shahadat Padha sangrezon ne kalma tumhara

Sada de raha hai hajar mom ho kar Mah-o-mahar ki jaan hai talwa tumhara

Tumhare hi saya mein palta hai aalam Hai konain ke sar pe saya tumhara

Azal se abad tak do-aalam palein ge Magar kam na hoga khazana tumhara

Khuda hai tumhara khudayi tumhari Yeh arsh-o-falak sab ilaqa tumhara

Ghareebo siwaye dar-e-Mustafa ke Kahein bhi na hoga guzara tumhara

Faqiro bajuz wali-e-baikasaan ke Nahi hai kahein bhi thikana tumhara

Gadaon ki hai bheed jab se suna hai Ke baab-e-ijabat huwa wa tumhara

Sada dete aatay hain mangta hazaron Ke daata rahay bol baala tumhara

Koi bhej do abr-e-rehmat ka tukda Ke hum par baras jaaye jhaala tumhara

Arab waale phera hamari taraf bhi Hai har samt rehmat ka daura tumhara

Usi waqt dhul jaayein isyaan ke daftar Shaha jis pe pad jaaye chheenta tumhara

Khuda ne bahut aastanay banaye Magar asal hai aastana tumhara

Matalib ka qibla hai gar sabz gumbad Maqasid ka Kaaba hai roza tumhara

Yeh hai daab-e-shahi ke Rabb-ul-Ula ne Dilaya malaik se pehra tumhara

Siwaye dar-e-paak ke mere daata Batao kahan jaaye mangta tumhara

Mere tan mein jab tak rahay saans baqi Ratay jaaun har waqt kalma tumhara

Na bachtay azabon se duniya mein munkir Jo un ko na milta waseela tumhara

Khuda hai mere dil ki angushtari par Woh naam-e-Khuda naam-e-wala tumhara

Nakeerain kya mujh se sakhti karein ge Hai aaina-e-dil mein naqsha tumhara

Khudaya Nakeerain mujh se yeh poochein Ke pahuncha dein Taiba ko laasha tumhara

Tadap kar basad shauq un se kahoon mein Main be-had hi mamnoon hoon ga tumhara

Dua hai ke jab waqt ho jaankani ka Ho dil mein Ahad lab pe kalma tumhara

Khuda ne hayat-e-abad is ko bakhshi Agar margaya koi shaida tumhara

Dua hai ke jab qabr mein mujh ko rakhein Madine se uth jaaye parda tumhara

Download Lyrics & Access Offline - Install Our App Now!

Sawaal-e-Nakeerain par mein lahad mein Dikha doon ga Maula yeh tughra tumhara

Dam-e-naz-o-qabr aur roz-e-qayamat Gharaz har jagah hai sahara tumhara

Garey saaray munkir jahannam mein pul se Na phisla koi naam-lewa tumhara

Na hooron ka talib na kuch fikr-e-jannat Dikha de Khuda mujh ko sehra tumhara

Ajab nikhat-e-jaanfiza hai tumhari Koi raah bhatka na joya tumhara

Usi se huay ambar-o-mushk mushtaq Hai khushbu ka masdar paseena tumhara

Jalein munkiran-e-qayam-o-wiladat Rahay ga yeh charcha hamesha tumhara

Suno munkiran-e-qayam-o-mahafil Ajab rang ka hai aqeeda tumhara

Batatay ho shirk aur hotay ho shamil Yeh hai be-hayai ka aana tumhara

Jameel ab toh khush ho nida aa rahi hai Ke maqbool hai yeh qaseeda tumhara