Dar e Nabi Ki Taraf Chala Hun

در نبی کی طرف چلا ہوں بدن پہ چادر ہے آنسوؤں کی لہو میں لذت ہے راستوں کی بغیر خوشبو مہک رہا ہوں درِ نبی کی طرف چلاہوں

سکون آمیز بے قراری ہے میری یکسوئیوں پہ طاری چلی براقِ کشش پہ لے کر رسول اکرم کی غم گساری رسائی ہے بخت نارسا میں سِرا ہے اِک دست مصطفیٰ میں میں ڈور کا دوسرا سِرا ہوں درِ نبی کی طرف چلاہوں

طواف کعبی تھا فرض مجھ پر درِ نبی کا ہے قرض مجھ پر سمٹ کے سایہ فگن ہوا ہے جہان کا طول و عرض مجھ پر شریک رفتار جو رہے ہیں وہ فاصلے ختم ہو رہے ہیں میں آج سے اپنی ابتدا ہوں درِ نبی کی طرف چلاہوں

دکھائی دینے لگا مدینہ مثالِ در کھُل رہا ہے سینہ ہوائیں حوروں کے لمس جیسی فضائیں خلد بریں کا زینہ کھلے ہوئے بازوؤں سی راہیں ہر اک مسافر کو اتنا چاہیں کہ ان کی چاہت پر مر مٹا ہوں درِ نبی کی طرف چلا ہوں

یہ ساعت قیمتی بھی آئی کہ حاضری کو چلی جدائی دھڑک رہے ہیں حواسِ خمسہ لرز رہی ہے برہنہ پائی بہشت عالم ہے یہ علاقہ قدم قدم نقش پائے آقا زمین کے شیشے میں دیکھتا ہوں درِ نبی کی طرف چلاہوں