Baharon Par Hain Aaj Araishein

Bahaaron par hain aaj aaraishein gulzaar-e-Jannat ki Sawaari aane wali hai shaheedan-e-mohabbat ki

Khule hain gul bahaaron par hai phulwari jarahat ki Faza har zakhm ki daaman se wabasta hai Jannat ki

Gala katwa ke bedi kaatne aaye hain ummat ki Koi taqdeer to dekhe aseeran-e-museebat ki

Shaheed-e-naaz ki tafreeh zakhmon se na kyunkar ho Hawayein aati hain un khidkiyon se baagh-e-Jannat ki

Karam walon ne dar khola to rehmat ne saman bandha Kamar bandhi to qismat khol di fazl-e-shahadat ki

Ali ke pyare khatoon-e-qayamat ke jigar pare Zameen se aasman tak dhoom hai un ki siyadat ki

Zameen-e-Karbala par aaj majma hai haseenon ka Jami hai anjuman roshan hain sham'ein noor-o-zulmat ki

Yeh woh sham'ein nahin jo phoonk dein apne fadayee ko Yeh woh sham'ein nahin ro kar jo kaatein raat aafat ki

Yeh woh sham'ein hain jin se jaan taaza payein parwane Yeh woh sham'ein hain jo hans kar guzarein shab museebat ki

Yeh woh sham'ein nahin jin se faqat ik ghar munawwar ho Yeh woh sham'ein hain jin se rooh ho kafoor zulmat ki

Dil-e-hoor-o-malaik reh gaya hairat zada ho kar Ke bazm-e-gul rukhan mein le balayein kis ki soorat ki

Juda hoti hain jaanein jism se jaanan se milte hain Huyi hai Karbala mein garm majlis-e-wasl-o-furqat ki

Usi manzar pe har jaanib se lakhon ki nigahien hain Usi aalam ko aankhein tak rahi hain saari khilqat ki

Hawa chhirkao paani ki jagah ashk-e-yateeman se Bajaye farsh aankhein bichh gayein ahl-e-baseerat ki

Hawaye yaar ne pankhe banaye par farishton ke Sabeilein rakhi hain deedaar ne khud apne sharbat ki

Download Lyrics & Access Offline - Install Our App Now!

Udhar aflak se laye farishte haar rehmat ke Idhar saghar liye hoorein chali aati hain Jannat ki

Saje hain zakhm ke phoolon se woh rangeen guldaste Bahaar-e-khushnumayi par hai sadqe rooh Jannat ki

Hawayein gulshan-e-Firdous se bas bas kar aati hain Narali itr mein doobi huyi hai rooh-e-nakhat ki

Dil-e-pur-soz ke salge agar soz aisi kasrat se Ke pahunchi arsh-o-Taiba tak lapit soz-e-mohabbat ki

Udhar chilman uthi husn-e-azal ke paak jalwon se Udhar chamki tajalli badr-e-taaban-e-risalat ki

Zameen-e-Karbala par aaj aisa hashr barpa hai Ke khinch khinch kar miti jaati hain tasveerein qayamat ki

Ghataein Mustafa ke chand par ghar ghar kar aati hain Siyah kaaraan-e-ummat teera bakhtaan-e-shaqawat ki

Yeh kis ke khoon ke pyase hain uske khoon ke pyase Bujhe gi pyaas jis se tishna kaamaan-e-qayamat ki

Akele par hazaron ke hazaron waar chalte hain Mita di deen ke hamrah izzat sharm-o-ghairat ki

Magar Sher-e-Khuda ka sher jab baphra ghazab aaya Pare toote nazar aane lagi soorat hazeemat ki

Kaha yeh bosa de kar haath par josh-e-daleeri ne Bahadur aaj se khayenge qasmein is shujaat ki

Tasadduq ho gayi jaan-e-shujaat sache tevar ke Fida sherana hamlon ki ada par rooh-e-juraat ki

Na hote gar Hussain Ibn-e-Ali is pyaas ke bhooke Nikal aati zameen-e-Karbala se nehar Jannat ki

Magar maqsood tha pyasa gala hi un ko katwana Ke khwahish pyaas se barhti rahe rooyat ke sharbat ki

Shaheed-e-naaz rakh deta hai gardan aab-e-khanjar par Jo maujein baar par aa jaati hain darya-e-ulfat ki

Yeh waqt-e-zakhm nikla khoon uchhal kar jism-e-athar se Ke roshan ho gayi mash'al shabistan-e-mohabbat ki

Sar-e-be-tan tan-e-aasani ko shahar-e-Taiba mein pahuncha Tan-e-be-sar ko sardari mili mulk-e-shahadat ki

Hassanؔ suni hai phir ifraat-o-tafreeit is se kyunkar ho Adab ke saath rehti hai rawish arbaab-e-sunnat ki