Bagh e Do Alam Dam Se

Bagh-e-do alam dam se tumhare hai gulzar Rasulullah Kon-o-makan hain rukh se tumhare pur-anwar Rasulullah

Get Lyrics On-The-Go! Download Our App Now!

Tum ho hashar ke raaj dulare noor-e-Ilahi arsh ke tare Naiya mori laga do kinare khewan har Rasulullah

Maula tum ne hamare gham mein shab bhar ro kar ki hain aahein Ummat par hai roz-e-azal se kitna pyar Rasulullah

Bhooli bhedhein hum hain tumhari charon taraf hain gurg shikari Koi nahi hai bachane wala ho gham-khwar Rasulullah

Haye na ki kuch hum ne kamayi laho-o-la'ab mein umr ganwayi Ab jo ghari pursish ki aayi tum ho yaar Rasulullah

Chaho bigaro ya ke sambhalo chaho duba'o ya ke nikalo Tum ho hamare maalik-o-hakim hum lachar Rasulullah

Maula chashm-o-qalb mein aaja lillah-e-bakht-e-siyah chamka ja Ujra ban hai hamare dil ka kar gulzar Rasulullah

Kar ke shafa'at tum bakhsha'o daman dhak kar aib chhupa'o Hashar mein apna koi nahi hai hami-e-kar Rasulullah

Rah kathan aur door hai manzil sar par isyan pa'on hain ghayal Haye chalein hum le kar kyonkar ye anbar Rasulullah

Khol do gesu barse rahmat dhul kar isyan paak ho ummat Chamke siyah bakhton ki qismat shab hai taar Rasulullah

Dooba hua suraj palta ya chand ko tukre kar ke dikhaya Hukm se tere kar sake koi kab inkar Rasulullah

Chaho jise firdaus mein ja do chaho jise dozakh mein bhejo Jannat-o-nar hain milk tumhari ho mukhtar Rasulullah

Khud hi Khuda ne tum ko parhaya ilm na tum se koi chhapaya Rab ne tumhare khole hain tum par sab asrar Rasulullah

Aaj Jameel Qadri dil se zikr apne aaqa ka kar le Door karenge beshak tere sab afkar Rasulullah