Amal Sab Se Bara

Amal sab se bada ta’at Habib-e-Kibriya ki hai Hai imaan naam jis ka woh mohabbat Mustafa ki hai

Tumhare dushmanon par ta-abad laanat Khuda ki hai Jo Abd-e-Mustafa hai us pe rehmat-e-Kibriya ki hai

Tere yaron ne tujh par jaan tak apni fida ki hai Isi baais se shohrat char yaar-e-ba-safa ki hai

Find Your Favorite Lyrics Anytime, Anywhere - Install the App Today!

Kahin Muzammil o Muddathir o Taha kahin Yaseen Tere Maula ne Quran mein teri kya kya sana ki hai

Zahe shaan-e-jalalat jab chale Me’raj ko Maula Toh Aqsa mein rasoolon ne unhi ki iqtida ki hai

Na phera hai kabhi khali muradein di hain munh mangi Tumhare aastan par jis gada ne iltija ki hai

Isi dam darja-e-maqbooliyat hasil hua us ko Tawassul se tumhare jis kisi ne jo dua ki hai

Mohabbat us ko kehte hain ke Maula-e-Wilayat ne Namaz-e-Asr aaram-e-Muhammad par fida ki hai

Owais Allahu Akbar ho gaye aashiq bila dekhe Abu Jahl aap ka tabe’ na ho qudrat Khuda ki hai

Safeena mera chakrata hai gardab-e-ma’asi mein Aghithni Ya Rasool Allah ghata sar par bala ki hai

Wahi hakim wahi maalik Khuda ke naib-e-mutlaq Toh phir kyun fikr tum ko aasiyo roz-e-jaza ki hai

Gunahgaro siyah karo khatawaro na ghabrao Sawari aane wali Shafe’-e-roz-e-jaza ki hai

Jameel-e-Qadri nazan na kyun ho apni qismat par Nawazish us pe har dam Hazrat-e-Ahmad Raza ki hai