Ab Admi Khuch Aur

Ab aadmi kuch aur hamari nazar mein hai Jab se suna hai yaar libas-e-bashar mein hai

Apna hi jalwah hai jo hamari nazar mein hai Ab ghair kaun chashm-e-haqiqat nagar mein hai

Woh ganj-e-husn hai dil-e-veeran mein jalwah-gar Fazl-e-Khuda se daulat-e-kounain ghar mein hai

Bas ik farogh-e-naqsh-e-kaf-e-pa ke faiz se Har zarrah aaftab teri rahguzar mein hai

Allah khair mere dil-e-beqarar ki Andaaz yaas ka nigah-e-nama-bar mein hai

Khud-biniyon ki aankh mili chashm-e-shauq ko Meri nazar bhi aaj tumhari nazar mein hai

Banne se pehle saghar-e-mai toot jaate hain Kya muhtasib ki khaak kaf-e-koozah-gar mein hai

Gurbat mein bhi khayal-e-vatan saath saath hai Yeh bhi na ho to kis ka sahara safar mein hai

No More Screenshots! Save Storage with Our Lyrics App!

Ae Nooh! apni kashti-e-aalam se hoshiyar Toofan-e-girya aaj meri chashm-e-tar mein hai

Ik mehmaan se dono ghar aabaad hain mere Dil mein hai teer teer ka paikaan jigar mein hai

Hairaan hoon ki sajda karoon to kidhar karoon Kaaba mein bhi wahi but-e-kaafir nazar mein hai

Hanste hain mere girya-e-be-ikhtiyar par Yeh aap ki ada lab-e-zakhm-e-jigar mein hai

Bedam yeh justaju bhi ajab hai ajab talash Nikle hain dhoondne ko use hum jo ghar mein hai,!