Bekhud Kiye Dete Hain Andaz Hijabana

Be-khud kiye dete hain andaaz-e-hijabana Aa dil mein tujhe rakh loon ay jalwa-e-janana

Jee chahta hai tohfay mein de doon main unhein aankhein Darshan ka toh darshan hai nazranay ka nazrana

Sang-e-dar-e-janan par karta hoon jabeen saai Sajda na samajh zahid sar deta hoon nazrana

No Internet? No Problem! Get the App for Offline Lyrics!

Itna toh karam karna ay chashm-e-karimana Jab jaan labon par ho tum samnay aa jana

Main hosh-o-hawaas apnay is baat pe kho baitha Hans kar jo kaha toonay yeh hai mera deewana

Peenay ko toh pee loon ga par arz zara si hai Ajmer ka saqi ho Baghdad ka maikhana

Kyun aankh milayi thi kyun baat barhayi thi Ab rukh ko chupa baithay kar ke mujhe deewana

Bedam meri qismat mein sajday hain isi dar kay Chhoota hai na chhootay ga sang-e-dar-e-janana