Sun Lo Meri Iltaja Ache Mian

Sun lo meri iltija achhay miyan Main tasadduq mein fida achhay miyan

Ab kami kya hai Khuda day bandah lay Main gada tum badshah achhay miyan

Deen-o-duniya mein bohat achha raha Jo tumhara ho gaya achhay miyan

Is buray ko aap achha kijiye Aap achhay mein bura achhay miyan

Aisay achhay ka bura hoon main bura Jin ko achhon ne kaha achhay miyan

Main hawalay kar chuka hoon aap ke Apna sab achha bura achhay miyan

Aap janain mujh ko is ki fikr kya Main bura hoon ya bhala achhay miyan

Mujh buray ke kaisay achhay hain naseeb Main bura hoon aap ka achhay miyan

Apnay mangta ko bula kar bheek di Ae main qurban-e-ata achhay miyan

Mushkilain aasaan farma dijiye Ae mure mushkil kusha achhay miyan

Meri jholi bhar do dast-e-faiz se Hazir-e-dar hai gada achhay miyan

Dam qadam ki khair mangta hoon tera Dam qadam ki khair la achhay miyan

Jaan-ba-lab hoon dard-e-isyan se huzoor Jaan-ba-lab ko do shifa achhay miyan

Dushmanon ki hai charhai al-ghiyas Hai madad ka waqt Ya achhay miyan

Nafs-e-sarkash dar-pay-e-aazar hai Hai madad ka waqt Ya achhay miyan

Shaam hai nazdeek sehra holnak Hai madad ka waqt Ya achhay miyan

Get Lyrics On-The-Go! Download Our App Now!

Naz'a ki takleef ighwa-e-adu Hai madad ka waqt Ya achhay miyan

Woh sawal-e-qabr woh shaklain muheeb Hai madad ka waqt Ya achhay miyan

Pursish-e-a'maal aur mujh sa aseem Hai madad ka waqt Ya achhay miyan

Bar-e-isyan sar pe ra'sha paaon mein Hai madad ka waqt Ya achhay miyan

Khali haath aaya bharay bazaar mein Hai madad ka waqt Ya achhay miyan

Mujrim-e-nakara-o-diwan-e-adl Hai madad ka waqt Ya achhay miyan

Poochtay hain kya kaha tha kya kiya Hai madad ka waqt Ya achhay miyan

Pa-shikasta aur uboor-e-pul-e-sirat Hai madad ka waqt Ya achhay miyan

Khain-o-khati se letay hain hisab Hai madad ka waqt Ya achhay miyan

Bhool jaaun na main seedhi raah ko Meray achhay rehnuma achhay miyan

Tum mujhay apna bana lo behr-e-Ghaus Main tumhara ho chuka achhay miyan

Kaun day mujh ko muradain aap dain Main hoon kis ka aap ka achhay miyan

Yeh ghataain gham ki yeh roz-e-siyah Mehar farma mah-laqa achhay miyan

Ahmad-e-Noori ka sadqa har jagah Munh ujala ho mera achhay miyan

Aankh neechi dono aalam mein na ho Bol bala ho mera achhay miyan

Meray bhai jin ko kehtay hain Raza Jo hain is dar ke gada achhay miyan

Un ki munh mangi muradain hoon husool Aap farmain ata achhay miyan

Umar bhar mein un ke saya mein rahoon Un pe saya aap ka achhay miyan

Mujh ko meray bhaiyon ko hashr tak Ho na gham ka samna achhay miyan

Mujh pe meray bhaiyon par har ghari Ho karam sarkar ka achhay miyan

Mujh se meray bhaiyon se door ho Dukh marz har qism ka achhay miyan

Meri meray bhaiyon ki hajtain Fazl se kijiye rawa achhay miyan

Hum ghulamon ke jo hain lakht-e-jigar Khush rahain sab da'iman achhay miyan

Panjtan ka saya panchon par rahay Aur ho fazl-e-Khuda achhay miyan

Sab azizon sab qareebon par rahay Saya-e-fazl-o-ata achhay miyan

Ghaus-e-Azam Qutb-e-Aalam ke liye Rad na ho meri dua achhay miyan

Ho Hasan sarkar-e-wala ka Hasan Kijiye aisi ata achhay miyan