Raza e Ghous Ahmed Ki

Raza-e-Ghaus Ahmad ki Raza hai Raza Ahmad ki marzi-e-Khuda hai

Kamalat-o-uloom-e-Mustafa se Shah-e-Jilan tujhe hissa mila hai

Tu aaina jamal-e-Mustafa ka Tu haq-go haq-shanas-o-haq-numa hai

Janab-e-Mustafa zill-e-Khuda hain Tu zill-e-Mustafa noor-e-Khuda hai

Tere hum ho chuke tu hai hamara Khuda ka tu hai aur tera Khuda hai

Jo munkir hai tera woh haq ka munkir Jo banda hai tera abd-e-Khuda hai

Tera mangta hai maqbool-e-Ilahi Tere munkir pe qahar-e-Kibriya hai

Muhyiddin na kyun ho naam tera Ke tu ne deen-e-haq zinda kiya hai

Koi Baghdad wale se yeh keh de Ke waqt-e-Islam par aakar pada hai

Koi ho us taraf rehmat ka phera Ke banda rah teri tak raha hai

Kidhar ho Qadri dulha kidhar ho Yeh har mujrim ke lab par iltija hai

Sharaf kis se bayan ho tere sar ka Wali ka taj tera naqsh-e-pa hai

Qadam tera liya hai jis ne sar par Woh be-shubha wali-e-ba-Khuda hai

Na kyun hon Hind ke Sultan Khawaja Ke aankhon par qadam tera liya hai

Wali kehte hain jin ko hain ra'iyat Shah-e-Baghdad shah-e-Auliya hai

Tu hai woh phool bagh-e-Mustafa ka Ke khushbu se teri aalam basa hai

Tu Zahra-o-Ali ka noor-e-ainain Tu sham-e-bazm-e-Shah-e-Karbala hai

Hasan ke phool mehka tujh se Baghdad Husaini itr tu sab mein basa hai

Shaheed-e-ishq kar rangat racha de Ke tu ibn-e-Shaheed-e-Karbala hai

Salateen-e-jahan hain us ke mangta Jo tere aastane ka gada hai

Mareezan-e-jahan ki fazl-e-Rabb se Tumhare hath mein kamil dawa hai

Shifa chaho to jald aao mareezo Dar-e-Ghaus-ul-Wara Dar-ush-Shifa hai

Laga hai dil ghulamon ka thikane Muridi la takhaf jab se suna hai

Tere darbar-e-pur-anwar se Ghaus Koi bhi laut kar khali phira hai

Jo dam mein chor ko abdal karde Woh rutba Ghaus-e-Azam ko mila hai

Jahan phaila de jholi un ka mangta Wahin majood Data ki ata hai

No Internet? No Problem! Get the App for Offline Lyrics!

Hamari mushkilen aasan karde Ke tu ibn-e-Ali Mushkil Kusha hai

Mita de zor-e-a'da-e-la'een ka Ke tu ibn-e-Ali Sher-e-Khuda hai

Jo darbar-e-Ilahi mein ho pursish To keh dena ke yeh banda mera hai

Amal wale to hain nazan amal par Mujhe Ya Ghaus tera aasra hai

Balaon mein ghira hai tera banda Khabar le Ghaus tera aasra hai

Bhanwar mein phans gaya mera safeena Madad farma ke tera aasra hai

Nakeerain aa gaye meri lahad mein Mere Ghaus ab to tera aasra hai

Hai nek-o-bad ki pursish aur main aasi Mere Ghaus aaj tera aasra hai

Siyah hain nama-e-a'mal mere Mere Ghaus aaj tera aasra hai

Main mujrim aur darbar-e-adalat Mere Ghaus aaj tera aasra hai

Wohi kar jo mere haq mein ho behtar Ke tu Shah-e-ata bahr-e-sakha hai

Ghulamon ka na kyun ho paar beda Ke un ke hath mein daman tera hai

Gali ho Ghaus ki aur mera bistar Ilahi bas yeh apni iltija hai

Jameel-e-Qadri phaila de jholi Ke un ke dar se bada bat raha hai