Khawaja e Hind Woh Darbar

Khwaja-e-Hind woh darbar hai a'ala tera Kabhi mehroom nahi mangne wala tera

No Internet? No Problem! Get the App for Offline Lyrics!

May-e-sar josh dar-e-aghosh hai sheesha tera Bekhudi chhaye na kyun pee ke piyala tera

Khuftagan-e-shab-e-ghaflat ko jaga deta hai Salha saal woh raton ka na sona tera

Hai teri zaat ajab bahr-e-haqeeqat pyare Kisi tairak ne paya na kinara tera

Jaur-e-pamali-e-alam se ise kya matlab Khak mein mil nahi sakta kabhi zarra tera

Kis qadar josh-e-tahayyur ke ayan hain aasar Nazar aaya magar aaina ko talwa tera

Gulshan-e-Hind hai shadab kaleje thande Wah ae abr-e-karam zor barasna tera

Kya mehak hai ke mu'attar hai dimagh-e-alam Takhta-e-gulshan-e-firdous hai roza tera

Tere zarre pe ma'asi ki ghata chhayi hai Is taraf bhi kabhi ae mehr ho jalwa tera

Tujh mein hain tarbiyat-e-Khizr ke paida aasar Bahr-o-bar mein hamein milta hai sahara tera

Phir mujhe apna dar-e-pak dikha de pyare Aankhein pur-noor hon phir dekh ke jalwa tera

Zill-e-Haq Ghous pe hai Ghous ka saya tujh par Saya gustar sar-e-khuddam pe saya tera

Tujh ko Baghdad se hasil hui woh shan-e-rafi' Dang reh jate hain sab dekh ke rutba tera

Kyun na Baghdad mein jaari ho tera chashma-e-faiz Bahr-e-Baghdad hi ki nehar hai darya tera

Kursi daali teri takht-e-Shah-e-Jilan ke huzoor Kitna ooncha kiya Allah ne paya tera

Rashk hota hai ghulamon ko kahin aqa se Kyun kahoon rashk-e-deh-e-Badr hai talwa tera

Bashar afzal hain malak se teri yun madh karoon Na malak khaas bashar karte hain mujra tera

Jab se tu ne qadam-e-Ghous liya hai sar par Auliya sar pe qadam lete hain shaha tera

Muhyi-e-Deen Ghous hain aur Khwaja Moinuddin hai Ae Hassan kyun na ho mehfooz aqeeda tera