Bagh e Jannat Ke Hain

Bagh-e-Jannat ke hain bahr-e-madh-khwan-e-Ahl-e-Bait Tum ko muzda naar ka ae dushmanan-e-Ahl-e-Bait

Kis zabaan se ho bayaan izz-o-shaan-e-Ahl-e-Bait Madh-gooye-Mustafa hai madh-khwan-e-Ahl-e-Bait

Un ki paaki ka Khudaye-paak karta hai bayaan Aayat-e-Tat-heer se zahir hai shaan-e-Ahl-e-Bait

Mustafa izzat barhane ke liye tazeem dein Hai buland iqbal tera doodman-e-Ahl-e-Bait

Un ke ghar mein be-ijazat Jibraeel aate nahi Qadr wale jaante hain qadr-o-shaan-e-Ahl-e-Bait

Mustafa ba'i kharidar is ka Allah mushtari Khoob chandi kar raha hai karwan-e-Ahl-e-Bait

Razm ka maidaan bana hai jalwah-gah-e-husn-o-ishq Karbala mein ho raha hai imtihaan-e-Ahl-e-Bait

Phool zakhmon ke khilaye hain hawaye-dost ne Khoon se seencha gaya hai gulistan-e-Ahl-e-Bait

Hoorein karti hain uroosan-e-shahadat ka sangaar Khubroo dulha bana hai har jawan-e-Ahl-e-Bait

Ho gayi tahqeeq eid-e-deed aab-e-tegh se Apne rozay kholte hain saaiman-e-Ahl-e-Bait

Jum'a ka din hai kitabein zeest ki tay kar ke aaj Khelte hain jaan par shehzadagan-e-Ahl-e-Bait

Your Lyrics, Even Offline - Install the App for Free!

Ae shabab-e-fasl-e-gul yeh chal gayi kaisi hawa Kat raha hai leh-lehata bostan-e-Ahl-e-Bait

Kis shaqi ki hai hukoomat haye kya andher hai Din dihade lut raha hai karwan-e-Ahl-e-Bait

Khushk ho ja khaak ho kar khaak mein mil ja Furaat Khaak tujh par dekh to sookhi zabaan-e-Ahl-e-Bait

Khaak par Abbas-o-Usman-e-alamdar hain Bekasi ab kaun uthaye ga nishaan-e-Ahl-e-Bait

Teri qudrat janwar tak aab se sairab hon Pyaas ki shiddat mein tarpe be-zabaan-e-Ahl-e-Bait

Qafila-salar manzil ko chale hain sonp kar Warith-e-be-warithan ko karwan-e-Ahl-e-Bait

Fatimah ke ladle ka aakhri deedar hai Hashr ka hangama barpa hai miyaan-e-Ahl-e-Bait

Waqt-e-rukhsat keh raha hai khaak mein milta suhag Lo salam-e-aakhri ae bewagan-e-Ahl-e-Bait

Abr fauj-e-dushmanan mein ae falak yun doob jaye Fatimah ka chand mehr-e-aasman-e-Ahl-e-Bait

Kis mazay ki lazzatein hain aab-e-tegh-e-yaar mein Khaak-o-khoon mein lot-te hain tishnagan-e-Ahl-e-Bait

Bagh-e-Jannat chhor kar aaye hain mehboob-e-Khuda Ae zahe qismat tumhari kushtagan-e-Ahl-e-Bait

Hoorein be-parda nikal aayi hain sar khole hue Aaj kaisa hashr hai Ya Rabb miyaan-e-Ahl-e-Bait

Koi kyun poochay kisi ko kya gharaz ae bekasi Aaj kaisa hai mareez-e-neem-jaan-e-Ahl-e-Bait

Ghar lutana jaan dena koi tujh se seekh jaye Jaan-e-aalam ho fida ae khandan-e-Ahl-e-Bait

Sar shaheedan-e-mohabbat ke hain nezon par buland Aur oonchi ki Khuda ne qadr-o-shaan-e-Ahl-e-Bait

Daulat-e-deedar payi paak jaanein bech kar Karbala mein khoob hi chamki dukan-e-Ahl-e-Bait

Zakhm khane ko to aab-e-tegh peene ko diya Khoob dawat ki bula kar dushmanan-e-Ahl-e-Bait

Apna sauda bech kar bazaar sona kar gaye Kaunsi basti basayi tajiran-e-Ahl-e-Bait

Ahl-e-Bait-e-paak se gustakhiyan be-bakiyan La'natullahi alaikum dushmanan-e-Ahl-e-Bait

Be-adab gustakh firqa ko suna de ae Hasan Yun kaha karte hain Sunni dastaan-e-Ahl-e-Bait