Bana Hai Daman e Har Harf

بنا ہے دامنِ ہر حرف' کہکشانِ حمد زمینِ لفظ پہ اترا ہے آسمانِ حمد

تمام خلق نے مل کر جو آج تک کی ہے ہے ناتمام سی اک سعی' درگمانِ حمد

ہیں خاک بستہ مرے لفظ' گنگ اور حیران سفر میں نُور کی رفتار سے ہے شانِ حمد

جھکاۓ رکھیۓ گا خواب میں بھی' شکر میں سر ہمہ میسر و امکاں ہے آستانِ حمد

ندامتوں کے اسیرِ خیال ! تُو ہی بتا سواۓ عجز بیاں کیا ہو ارمغانِ حمد؟

Find Your Favorite Lyrics Anytime, Anywhere - Install the App Today!

خجالتوں سے بھری زندگی ! اشارہ کر دبیز چُپ کے علاوہ ہو کیا زبان حمد؟

شہادت اس کی ربوبیت اور عظمت کی ہر ایک ذرۃ تخلیق ہے نشانِ حمد

ہزار عمرِ خضر بھی اداۓ شکر کو کم کسی بھی طور مکمل نہ ہو بیانِ حمد

زمیں سے آگے نہ پہنچیں لغات ہاۓ بشر کوئی بھی دیکھ نہیں پایا لامکانِ حمد

ازل سے محو ہیں تسبیح میں سبھی اُس کی اک ایک ذرۃ خاکی ہے اک جہانِ حمد

درود اس پہ ہمہ شکر ذات ہے جس کی تھی جس نبیؐ کی خموشی بھی ترجمانِ حمد

وہ جس سے بڑھ کے کسی نے نہ رب کی' کی تعریف تھا جس رسول کا ایک ایک سانس جانِ حمد

نظر سے دور اندھیرے جمے خلاؤں میں کروں میں کہکشاؤں میں سُن اذانِ حمد

شمار و حد قیاس وگمان سے باہر مدام پھیلتا بڑھتا ہوا بیانِ حمد

ریاض سوچ یہ' غربالِ لفظ کے اندر سمٹ سکے گا کبھی بحرِ نیکرانِ حمد؟

اسی ردیف و قوافی سے بحر دیگر میں ریاضؔ اور بھی ہوجاۓ کچھ بیانِ حمد