Aye Deen e Haq Ke Rehbar

Ae deen-e-haq ke rehbar tum par salam har dam Mere shafee-e-mehshar tum par salam har dam

Is bekas-o-hazein par jo kuch guzar rahi hai Zahir hai sab woh tum par, tum par salam har dam

Dunya-o-aakhirat mein jab mein rahoon salamat Pyare parhoon na kyunkar tum par salam har dam

Dil tafta-gan-e-furqat pyase hain muddaton se Hum ko bhi jaam-e-Kausar tum par salam har dam

Banda tumhare dar ka aafat mein mubtala hai Reham ae Habib-e-Dawar tum par salam har dam

No More Screenshots! Save Storage with Our Lyrics App!

Be-warison ke waris be-waliyon ke wali Taskeen-e-jaan-e-muztar tum par salam har dam

Lillah ab hamari faryad ko pahunchiye Be-had hai haal abtar tum par salam har dam

Jallad-e-nafs-e-bad se deeje mujhe rihai Ab hai gale pe khanjar tum par salam har dam

Daryoza-gar hoon mein bhi adna sa is gali ka Lutf-o-karam ho mujh par tum par salam har dam

Koi nahin hai mera mein kis se daad chahoon Sultan-e-banda-parwar tum par salam har dam

Gham ki ghataein ghir kar aayi hain har taraf se Ae meher-e-zarra-parwar tum par salam har dam

Bulwa ke apne dar par ab mujh ko deeje izzat Phirta hoon khwar dar dar tum par salam har dam

Mohtaj se tumhare karte hain sab kinara Bas ik tumhein ho yawar tum par salam har dam

Bahr-e-Khuda bachao in khar-haye gham se Ik dil hai lakh nashtar tum par salam har dam

Koi nahin hamara hum kis ke dar pe jayen Ae be-kason ke yawar tum par salam har dam

Kya khauf mujh ko pyare naar-e-jaheem se ho Tum ho shafee-e-mehshar tum par salam har dam

Apne gada-e-dar ki leeje khabar khudara Keeje karam Hasanؔ par tum par salam har dam