Assalam Aye Khusr o Dunya

As-salam ae khusrow-e-dunya o deen As-salam ae rahat-e-jan-e-hazeem

As-salam ae badshah-e-do jahan As-salam ae sarwar-e-kon-o-makan

As-salam ae noor-e-imaan as-salam As-salam ae rahat-e-jaan as-salam

Ae shakeeb-e-jan-e-muztar as-salam Aftab-e-zarra parwar as-salam

Dard-o-gham ke chara farma as-salam Dard mandon ke maseeha as-salam

Ae muradein dene wale as-salam Donon alam ke ujale as-salam

Dard-o-gham mein mubtala hai yeh ghareeb Dam chala teri duhai ae tabeeb

Nabzein saaqit rooh muztar jee nidhaal Dard-e-isyaan se hua hai ghair haal

Be-saharon ke sahare hain huzoor Haami-o-yawar hamare hain huzoor

Hum ghareebon par karam farmaiye Bad naseebon par karam farmaiye

Be-qararon ke sarhane aaiye Dilfigaron ke sarhane aaiye

Jaan-e-lab ki chara farmai karo Jaan-e-Isa ho maseehai karo

Shaam hai nazdeek manzil door hai Paon kaise jaan tak ranjoor hai

Offline Lyrics Anytime, Anywhere - Download the App Today!

Maghribi goshon mein phooti hai shafaq Zardi-e-khursheed se hai rang-e-faq

Raah na-maloom sehra par-khatar Koi saathi hai na koi rahbar

Tairon ne bhi baseera le liya Khwahish-e-parwaz ko rukhsat kiya

Har taraf karta hoon hairat se nigah Par nahi milti kisi soorat se raah

Sau balayein chashm-e-tar ke samne Yaas ki soorat nazar ke samne

Dil pareshan baat ghabrai hui Shakl par afsurdagi chhai hui

Zulmatein shab ki ghazab dhane lagein Kaali kaali badliyan chhane lagein

In balaon mein phansa hai khana zaad Aafton mein mubtala hai khana zaad

Ae Arab ke chaand ae mehr-e-Ajam Ae Khuda ke noor ae sham-e-haram

Farsh ki zeenat hai dam se aap ke Arsh ki izzat qadam se aap ke

Aap se hai jalwa-e-Haq ka zuhoor Aap hi hain noor ki aankhon ke noor

Aap se roshan hue kon-o-makan Aap se pur-noor hai bazm-e-jahan

Ae Khudawand-e-Arab Shah-e-Ajam Keejiye Hindi ghulamon par karam

Hum siyah-karon pe rehmat keejiye Teera-bakhton ki shafa'at keejiye

Apne bandon ki madad farmaiye Pyare haami muskurate aaiye

Ho agar shaan-e-tabassum ka karam Subah ho jaye shab-e-daijoor-e-gham

Zulmaton mein gum hua hai raasta Al-madad ae khanda-e-dandan numa

Haan dikha jaana tajalli ki ada Thokarein khata hai pardesi tera

Dekhiye kab tak chamakte hain naseeb Der se hai lau lagaye yeh ghareeb

Multaji hoon main Arab ke chaand se Apne Rab se apne Rab ke chaand se

Main bhikari hoon tumhara tum ghani Laaj rakh lo mere phaile haath ki

Tang aaya hoon dil-e-naakaam se Is nikamme ko laga do kaam se

Aap ka darbar hai Arsh-ishtibah Aap ki sarkar hai be-kas panah

Maangte phirte hain sultan-o-ameer Raat din pheri lagate hain faqeer

Ghamzadon ko aap kar dete hain shaad Sab ko mil jaati hai munh mangi murad

Main tumhara hoon gadaye be-nawa Keeje apne be-nawaon par ata

Main ghulam-e-heech karah hoon huzoor Heech karon par karam hai par zaroor

Achhe achhon ke hain gahak har kaheen Hum badon ki hai khareedari yaheen

Keejiye rehmat Hasan par keejiye Donon alam ki muradein dijiye