Tabiyat Aaj Kyun Aesi

طبیعت آج کیوں ایسی رَسا ہے کہ خود اپنی زباں پر مرحبا ہے

صبا کیوں اس قدر اِترا رہی ہے چمن میں کون سا غنچہ کھلا ہے

عنا دِل گارہی ہیں کیوں ترانے یہ کیسا شاد ہر شاہ و گدا ہے

یہ کیسے شادیانے بج رہے ہیں یہ کیوں بابِ مسرت آج وا ہے

تحیرّ جب بڑھا ہاتف پکارا رضائے قادری دولہا بنا ہے

براتی ہیں تمامی اہلسنت رضائے قادری دولہا بنا ہے

توکل کے شجر میں پھل یہ آیا کہ عبدالمصطفیٰ دولہا بنا ہے

ترانے گارہی ہیں قمریاں آج کہ عبدالمصطفیٰ دولہا بنا ہے

امیدوں کے کھلے ہیں آج غنچے کہ عبدالمصطفیٰ دولہا بنا ہے

بریلی کا نصیبہ جگمگایا کہ عبدالمصطفیٰ دولہا بنا ہے

براتی آرہے ہیں وجد کرتے کہ عبدالمصطفیٰ دولہا بنا ہے

یہ دیکھو صدقۂ صدیقِ اکبر کہ عبدالمصطفیٰ دولہا بنا ہے

یہ ہے فاروقِ اعظم کی کرامت کہ عبدالمصطفیٰ دولہا بنا ہے

کرم عثمان ذُوالنورین کا ہے کہ عبدالمصطفیٰ دولہا بنا ہے

سخاوت ہے عَلِّی مرتضٰی کی کہ عبدالمصطفیٰ دولہا بنا ہے

گھٹا بغداد سے اُٹھی کرم کی کہ عبدالمصطفیٰ دولہا بنا ہے

یہ ہے بغداد والے کا تصرف کہ عبدالمصطفیٰ دولہا بنا ہے

مبارک اہلسنت کو مبارک رضائے قادری دولہا بنا ہے

کہیں کیونکر نہ اچھے تجھ کو اچھا حضور اچھے کا تو اچھا ہوا ہے

بھکاری آرہے ہیں بھیک لینے رضا کے درسے باڑا بٹ رہا ہے

جلیں اَعدائے دیں نار حسد میں کہ یوں ہی اُن کی قسمت کا بدا ہے

رضا کیونکر نہ ہواَعدا پہ غالب کہ وہ تو نائب شیرِ خدا ہے

منافق ہے عدو اس آستاں کا جو سنی ہے وہ اس در کا گدا ہے

رُخِ قبلہ اگر پوچھو تو کہہ دوں درِ احمد رضا قبلہ نما ہے

بِحَمْدِ اللہ خوشبوئے رضا سے دِماغِ اَہلسنت بس رہا ہے

پھلے اُن کا الٰہی باغِ اولاد یہ ہر سُنی کے لب پر اِلتجا ہے

جمیلِؔ قادری اَلْحَمْدُ لِلّٰہ کہ تو اس آستانے کا گدا ہے