Sabz Gumbad Ki Ziarat Kijiye

سبز گُنبد کی زیارت کیجئے زائرو! سامانِ راحت کیجئے

گنبدِ خَضرا کے جلوے دیکھ کر خوب روشن اپنی قسمت کیجئے

آگیا میٹھا مدینہ آگیا جھوم کر خوب ان کی مِدحت کیجئے

مسجدِنبوی میں ہر دم بھائیو! دل لگا کر اب عبادت کیجئے

زائرو! رو رو کر ان کے سامنے پیش اپنی اپنی حاجت کیجئے

قلبِ مُضطَر چشمِ تَر سوزِ جگر یانبی! مجھ کو عنایت کیجئے

اَزپئے احمدرضا مجھ کو عطا سُنّیت پر اِستِقامت کیجئے

ازپئے غوثُ الورٰی یامصطَفٰے میرے ایماں کی حفاظت کیجئے

از طفیلِ مرشدی دل سے مِرے دُور دنیا کی مَحبَّت کیجئے

فاطِمہ زَہرا کا صَدقہ مجھ سے دور نفس و شیطاں کی شرارت کیجئے

دُور غم دنیا کے فرما دیجئے غم مدینے کا عنایت کیجئے

اپنے اَخلاقِ کریمہ سے مجھے ایک ذرّہ ہی عنایت کیجئے

دردِ عِصیاں کی دوا کیجے عطا عاصِیوں پر چشمِ رَحمت کیجئے

عادتِ عِصیاں نہیں جاتی حضور آپ ہی کچھ جانِ رَحمت کیجئے

مجھ کو توفیقِ عبادت ہو عطا مجھ کو پابندِ شریعت کیجئے

سنّتوں کی ہر طرف آئے بہار دُور فیشن کی نُحُوست کیجئے

یانبی! مجھ کو! بقیعِ پاک میں بَہرِ مدفن جا عنایت کیجئے

ہُوں نہایت ہی ضعیف و ناتُواں میری دشمن سے حفاظت کیجئے

ہو عطا سوزِ بِلال آقا مجھے اور اپنا غم عنایت کیجئے

گُھپ اندھیرے میں ہوں تنہا اَلمدد قبر روشن نورِ عزّت کیجئے

عیب محشر میں نہ کُھل جائیں کہیں سایۂ دامانِ رَحمت کیجئے

گرمیِ محشر سے جاں ہے مُضطَرِب جامِ کوثر اب عنایت کیجئے

مجرِموں کی صَف میں ہوں آقا کھڑا یانبی! آکر شَفاعت کیجئے

کربلا والوں کے صدقے مجھ سے دور یانبی! رنج و مصیبت کیجئے

مختصر سی زندگی ہے بھائیو! نیکیاں کیجے نہ غفلت کیجئے

گر رِضائے مصطَفٰے درکار ہے سنّتوں کی خوب خدمت کیجئے

سُنَّتیں اپنا کے حاصِل بھائیو! رَحمتِ مولیٰ سے جنّت کیجئے

عیدِ مِیلادُالنَّبی پر بھائیو! خوب اظہارِ مَسرَّت کیجئے

ہِجر کے ماروں پہ بھی چشمِ کرم! اِذن، طیبہ کا عنایت کیجئے

میرے چہرے پر کفن ڈھک دیجئے ساتھیو رُسوا مجھے مت کیجئے

اب نِقابِ رُخ اُلٹ دیجے حُضُور جاں بلب پر چشمِ رَحمت کیجئے

حاضِرِ دربار پھر بدکار ہے چشمِ رَحمت جانِ رَحمت کیجئے

بڑھتے جاتے ہیں گنہ عطارؔ آہ! کچھ تو اظہارِ نَدامت کیجئے

سبز گنبد پر فِدا ہوجایئے کیجئے عطارؔ ہمّت کیجئے