Rah Gum Karda Musafir Ka Nigehban Tu Hai

Rah-e-gum karda musafir ka nigahban tu hai Ufaq-e-jaan par misal-e-meh-e-taban tu hai

Tu jo mera hai toh main be-sar-o-saman hi bhala Lillah-il-hamd, ke mera sar-o-saman tu hai

Mujh ko kya ilm ke kis tarah badalti hain rutein Jab mere dasht-e-khazan par bhi gul-afshan tu hai

Never Be Without Your Favorite Lyrics - Get the App for Offline Access!

Us Khuda se mujhe kaise ho majal-e-inkar Jis ke shah-para-e-takhleeq ka unwan tu hai

Apne har azm ki takmeel par imaan hai mera Pas-e-har azm agar silsila-e-jumban tu hai

Tere dam se hamein irfan-e-Khudavand mila Nau-e-insan par Khudavand ka ehsan tu hai

Yeh batane ko ke ba-wazan hai insaan ki zaat Dast-e-Yazdan ne jo bakhshi hai, woh mizan tu hai

Khak mein aaj bhi hai goonj, tere qadmon ki Aur aflak ki wusat mein kharaman tu hai

Tu ne faqa bhi kiya, apna gareban bhi siya Aur phir Zaat-e-Ilahi ka bhi mehman tu hai

Tera kirdar hai ahkam-e-Khuda ki ta’eed Chalta phirta, nazar aata hua Quran tu hai

Rang ki qaid na qadghan koi naslon ki yahan Jis ke dar sab par khule hain woh dabistan tu hai

Mere naqqad ko shayad abhi maloom nahin Mera imaan hai mukammal, mera imaan tu hai