Iss Qadar Kon Muhabat Ka Silaa Deta Hai

Is qadar kaun mohabbat ka sila deta hai Us ka banda hoon jo banday ko Khuda deta hai

Jab utarti hai meri rooh mein azmat us ki Mujh ko masjood-e-mala'ik ka bana deta hai

Rehnumai ke ye tevar hain ke mujh mein bas kar Woh mujhe mere hi jauhar ka pata deta hai

Us ke irshad se mujh par mare asrar khulay Ke woh har lafz mein aaina dikha deta hai

Zulmat-e-dahr mein jab bhi main pukaaroon us ko Woh mere qalb ki qandeel jala deta hai

Us ki rehmat ki bhala aakhri had kya hogi Dost ki tarah jo dushman ko dua deta hai

Get Lyrics On-The-Go! Download Our App Now!

Wohi nimtay ga mari fikr ke sanaton se But kadon ko jo azanon se basa deta hai

Wohi sarsabz karay ga mare veeranon ko Aandhiyon ko bhi jo kirdar-e-saba deta hai

Qadam uthtay hain maray, janib-e-Yasrib jab bhi Ik farishta mujhe Shaheer ki hawa deta hai

Fan ki takhleeq ke lamhon mein tasawwur us ka Roshni mere khayalon mein mila deta hai

Qasr-o-aiwan se guzar jata hai chup chaap Nadeem Dar-e-Muhammad ﷺ ka jab aaye to sada deta hai