Qibla Ka Bhi Kaaba

قبلہ کا بھی کعبہ رُخِ نیکو نظر آیا کعبہ کا بھی قبلہ خمِ اَبرو نظر آیا

محشر میں کسی نے بھی مری بات نہ پوچھی حامی نظر آیا تو بس اِک تو نظر آیا

پھر بند کشاکش میں گرفتار نہ دیکھے جب معجزۂ جنبش اَبرو نظر آیا

اس دل کے فدا جو ہے تری دید کا طالب اُن آنکھوں کے قربان جنہیں تو نظر آیا

سلطان و گدا ہیں سب تِرے دَر کے بھکاری ہر ہاتھ میں دروازہ کا بازو نظر آیا

سجدہ کو جھکا جائے براہیم میں کعبہ جب قبلۂ کونین کا اَبرو نظر آیا

بازارِ قیامت میں جنہیں کوئی نہ پوچھے ایسوں کا خریدار ہمیں تو نظر آیا

محشر میں گنہگار کا پلہ ہوا بھاری پلہ پہ جو وہ قربِ ترازو نظر آیا

یا دیکھنے والا تھا ترا یا ترا جویا جو ہم کو خدا بین و خدا جو نظر آیا

شل ہاتھ سلاطیں کے اُٹھے بہر گدائی دروازہ ترا قوتِ بازو نظر آیا

یوسف سے حسیں اور تمنائے نظارہ عالم میں نہ تم سا کوئی خوش رُو نظر آیا

Instant Access to Thousands of Lyrics - Tap to Install!

فریادِ غریباں سے ہے محشر میں وہ بے چین کوثر پہ تھا یا قربِ ترازو نظر آیا

تکلیف اُٹھا کر بھی دعا مانگی عدو کی خوش خلق نہ ایسا کوئی خوش خو نظر آیا

ظاہر ہیں حسنؔ احمد مختار کے معنٰے کونین پہ سرکار کا قابو نظر آیا