Meri Pehchan Hai Seerat Unki

Meri pehchan hai seerat un ki Mera imaan mohabbat un ki

Dekh kar Ghare-e-Hira sochta hoon Kitni bharpoor thi khalwat un ki

Pattharon mein bhi lahoo daud gaya Is qadar aam thi rehmat un ki

Aaj hum falsafa kehte hain jise Woh musawat thi aadat un ki

Fatah-e-Makkah mere daaway ki daleel Adl ki jaan adalat un ki

Offline Lyrics Anytime, Anywhere - Download the App Today!

Irtaqa is se ijazat mange Un ki ho jaye jo ummat un ki

Main ke raazi ba-razaye Rabb hoon Koi hasrat hai to hasrat un ki

Waqt aur faasla bar-haq lekin Mera fan karta hai bai'at un ki

Mera mayar-e-ghazal khwani hai Harf-e-saada mein balaghat un ki

Naat meri hai, ishara un ka Phool mere hain to naghat un ki

Main ke har haal mein hoon shukar-e-Tab Koi haajat hai to haajat un ki

Kibriyai par karoon ghaur, Nadeem Aur takta rahoon soorat un ki