Mere Dil Mein Tere Qadmon

میرے دل میں ترے قدموں کے نشاں ملتے ہیں ایسے مہتاب اندھیروں کو کہاں ملتے ہیں

کھیلتے ہیں ترے آنگن میں خدا کے اسرار جس پہ کھل جائیں اسے دونوں جہاں ملتے ہیں

جب بھی چپ ہوتا ہوں آجا تا ہے ہونٹوں پہ درود اکثر اوقات محمدؐ مرے ہاں ملتے ہیں

داغ داغ اپنا بدن لے کے کہاں جاؤں گا ان کی گلیوں میں تو شیشے کے مکاں ملتے ہیں

ان کے عشاق میں دیوانوں میں درباریوں میں اہل دل اہل نظر اہل زباں ملتے ہیں

بند آنکھوں سے انھیں دیکھ لیا کرتا ہوں خون کی طرح رگ و پے میں رواں ملتے ہیں

جس کے پاس ان کی محبت کے کھرے سکے ہوں چند سکوں میں اسے کون و مکاں ملتے ہیں

روک لیتے ہیں مظفر جو گناہوں سے مجھے میرے اندر ہی کچھ ایسے نگراں ملتے ہیں