Malk e Khaas Kibriya Ho

ملکِ خاصِ کِبریا ہو مالکِ ہر ماسِوا ہو

کوئی کیا جانے کہ کیا ہو عقلِ عالَم سے وَرا ہو

کَنزِ مَکتومِ اَزل میں دُرِّ مَکْنُونِ خدا ہو

سب سے اوّل سب سے آخر اِبتِدا ہو اِنتِہا ہو

تھے وسیلے سب نبی تم اصل مَقْصُودِ ہُدیٰ ہو

پاک کرنے کو وُضو تھے تم نمازِ جانفزا ہو

سب بِشارَت کی اذاں تھے تم اذاں کا مُدَّعا ہو

سب تمہاری ہی خبر تھے تم مُؤخَّر مُبتَدا ہو

قُربِ حق کی منزلیں تھے تم سفر کا مُنْتَہیٰ ہو

قبلِ ذکر اِضمار کیا جب رُتْبَہ سابِق آپ کا ہو

طُورِ موسیٰ چَرخِ عیسیٰ کیا مُساوِیِ دَنیٰ ہو

سب جِہَت کے دائرے میں شَش جِہَت سے تم وَرا ہو

سب مکاں تم لامکاں میں تن ہیں تم جانِ صَفا ہو

سب تمہارے در کے رستے ایک تم راہِ خُدا ہو

سب تمہارے آگے شافِع تم حضورِ کِبریا ہو

سب کی ہے تم تک رسائی بارگہ تک تم رسا ہو

وہ کَلَس رَوضے کا چمکا سر جھکاؤ کَج کُلاہو

Download Lyrics & Access Offline - Install Our App Now!

وہ درِ دولت پہ آئے جھولیاں پھیلاؤ شاہو