Izat e Arsh o Falak

عزتِ عرش و فلک پائے رسولِ عربی عرشِ رحمٰن بنا جائے رسولِ عربی

سر میں یارب رہے سودائے رسولِ عربی اور آنکھوں میں تجلائے رسولِ عربی

جن کے دل میں ہے تولَّا ئے رسولِ عربی کیوں نہ بھائے اُنہیں صحرائے رسولِ عربی

داغِ عشقِ شہِ دِیں روز ترقی پہ رہے میری آنکھیں رہیں جویائے رسولِ عربی

اس قدِ پاک کا سایہ نظر آتا کیونکر نور ہی نور ہیں اَعضائے رسولِ عربی

تشنہ کاموں تمہیں مژدہ کہ بروزِ محشر جوش پر آگیا دَریائے رسولِ عربی

عید ہو مجھ کو کہ دیکھوں کبھی دِیدارِ خدا اور کبھی صورتِ زیبائے رسولِ عربی

کیوں دکھاتا ہے تپش مہرِ قیامت ہم کو دیکھ ہشیار کہ وہ آئے رسولِ عربی

اب برستی ہے شفاعت کی بھرن اُمت پر بخشوانے کے لیے آئے رسولِ عربی

اُمتی وِردِ زباں تاجِ کرامت بر سر یوں شفاعت کے لیے آئے رسولِ عربی

کیوں نہ محشر میں پریشان پھرے وہ کمبخت جس کے سر میں نہیں سودائے رسولِ عربی

حکم ہوگا کہ اُسے داخلِ جنت کردو جس کے دِل میں ہے تمنائے رسولِ عربی

زیرِ دَامانِ نبی حشر میں ہم دیکھیں سیر جب جلیں نار میں اَعدائے رسولِ عربی

چشمِ صدیق سے دیکھے کوئی اُن کی صورت نور ہی نور نظر آئے رسولِ عربی

اپنی آنکھوں کو ملوں جان تصدق کردوں دیکھوں گر نقشِ کفِ پائے رسولِ عربی

گر سوالاتِ نکیرین سے وَحشت ہو مجھے منہسے نکلے کہ ہوں شیدائے رسولِ عربی

حور و غلماں و جناں کیوں نہ ہوں تیرے مشتاق ہے وظیفہ مرا اَسمائے رسولِ عربی

ہے تمنائے جمیلؔ رضوی یااللہ میرا مسکن بنے صحرائے رسولِ عربی