Ilaj e Gardish e Lail o Nahar Tu Ne Kiya

Ilaj-e-gardish-e-lail-o-nahar tu ne kiya Ghubar-e-rah ko chhoo kar bahar tu ne kiya

Har aadmi ko tashakhus mila tere dam se Jo be-shumar thay, un ko shumar tu ne kiya

Utha ke qaar-e-mazallat se ibn-e-Adam ko Waqar tu ne diya, ba-waqar tu ne kiya

Koi na jin ki sunay un ki baat tu ne suni Mila na pyar jinhein, un se pyar tu ne kiya

Agar gareeb ko bakhshay huqooq-e-la-mehdood Toh qasr-e-shah ko bhi be-hisar tu ne kiya

Jinhein gumaan thay bohat, apni sarfarazi ke Ba-yak nigah unhein, khaksar tu ne kiya

Dil-o-dimagh ke sab chand ho chukay thay ghuroob Yeh woh ufaq hai, jisay tab-dar tu ne kiya

Jamal-e-qowl-o-amal ho ke husn-e-sidq-o-safa Khuda ne jo bhi diya, payedar tu ne kiya

Jab un ke nutq ko pohnchi, tere yaqeen ki aanch Jo be-zabaan thay, unhein sho'la-bar tu ne kiya

No Internet? No Problem! Get the App for Offline Lyrics!

Yeh lutf Ghalib o Iqbal tak nahi mehdood Nadeem ko bhi sadaqat-nigar tu ne kiya