Hum Hain Qalam Dawaat

ہم ہیں، قلم دوات ہے، میدانِ نعت ہے روز الست سے ہمیں فرمانِ نعت ہے

عالم فدائے وسعتِ دامانِ نعت ہے جس جس کو دیکھیے وہی قربانِ نعت ہے

نعتیں ہیں اس میں جیسے ہوں قرآں کی آیتیں سینے میں دل نہیں مرے، جزدانِ نعت ہے

ہر دور کے شعور کی تشکیل کے لیے درکار ہر زمانے کو فیضانِ نعت ہے

نورِ تجلیاتِ رسالت کے فیض سے ’’ہر شعبہ حیات میں امکانِ نعت ہے‘‘

کلیاں چٹک چٹک کے یہی کہہ رہی تھیں سب ہم کو بھی شوق دید ہے، ارمانِ نعت ہے

تلتے ہی جا رہے ہیں جو دیوان ہائے نعت میزانِ عدل ہے کہ یہ میزانِ نعت ہے

حسان ایک فرد نہیں ایک سوچ ہے مدحت سرا ہے جو بھی وہ حسانِ نعت ہے

توصیف مصطفےٰ کی ہے توصیفِ کردگار بین السطورِ حمد بھی عنوانِ نعت ہے

اس پر فدا، ہے جس کو ودیعت شعورِ نعت اس پر نثار جو بھی سخندانِ نعت ہے

تلقین خود حضور نے سعدی کو جو کیا وہ مصرعِ درود ہی سلطانِ نعت ہے

اے وجہ کُن فکاں! شہِ ما کان ما یکون بس تیری ذات کے لیے امکانِ نعت ہے

"لَا یُمکِنُ الثناءُ کما کان حقہ" ذکر علو و مرتبت و شانِ نعت ہے

"غالب! ثنائے خواجہ بہ یزداں گذاشتیم" عجزِ بیانِ عبدِ قدردانِ نعت ہے

سیاح لامکاں تری اک سیر کے طفیل اب لامکاں بھی شاملِ امکانِ نعت ہے

عاجز وفور شوق میں حد ادب رہے لا ترفعوا اسی لیے دربان نعت ہے