Har Jaga Hain Jalwa

ہر جگہ ہیں جلوہ گستر دیکھ لو ہر مکاں ہر دل کے اندر دیکھ لو

اُن کا جلوہ ہر جگہ موجود ہے چاہو جس دَم آنکھ اُٹھا کر دیکھ لو

عرش و فرش و لامکاں ہی میں نہیں بلکہ ہر ذَرَّہ کے اندر دیکھ لو

اس قدر رکھو تصوّر ہر گھڑی اُن کی صورت دِل کے اندر دیکھ لو

رُویت حق کی تمنا ہے اگر شاہ کا رُوئے منوّر دیکھ لو

چودھویں کا چاند بھی شرمائے گا خاکِ طیبہ منہ پہ مَل کر دیکھ لو

خلد آئے گی منانے کے لیے آستاں پر اُن کے مر کر دیکھ لو

چاہتے ہو گر رہے باقی نشاں آستاں پر اُن کے مٹ کر دیکھ لو

یوں مُنادی حشر میں دے گا ندا کشتیِ اُمت کا لنگر دیکھ لو

پیاس سے باہر زبانیں آگئیں بہرِ حق یا شاہِ کوثر دیکھ لو

عرش و فرش ولا مکاں سب مِلک ہیں ایسے ہوتے ہیں تونگر دیکھ لو

عرضِ حاجت کی ضرورت ہی نہیں حال سب روشن ہے تم پر دیکھ لو

ہے پھنسا غم میں جمیلؔ قادری رَحمِ گستر بندہ پروَر دیکھ لو