Bashar Se Ghair Mumkin Hai

Bashar se ghair mumkin hai sana Hazrat Muhammad ki Khuda karta hai khud Quran mein midhat Muhammad ki

Pasand-e-Haq hui Salli 'Ala surat Muhammad ki Na kyun dono jahan ko dil se ho chahat Muhammad ki

Hai muzdah mominon ko man raani qad ra'al haqqa Khuda dekha jise hasil hui ru'yat Muhammad ki

Bashar jin-o-malak hargiz nahin mumkin ke pehchanain Khuda hi jaanta hai rif'at-o-shaukat Muhammad ki

Khuda se apni ummat ke liye poocha jo Musa ne To farmaya ke afzal sab se hai ummat Muhammad ki

Huye but sar-nigoon aatish kadah mein zalzalah aaya Dilon par chha gayi kuffaar ke haibat Muhammad ki

More Lyrics, Less Storage - Install the App and Ditch the Screenshots!

Ilahi bandah-e-naacheez ki tujh se du'a yeh hai Taraqqi par rahe dil mein sada ulfat Muhammad ki

Bhikari ne'maton se bhar rahe hain jholiyan apni Masakeen-e-jahan par waqf hai daulat Muhammad ki

Yeh rahmat hai ke dete hain du'ayen dushmanon ko bhi Niraali saare aalam se hai har 'aadat Muhammad ki

Chamakti thi woh bijli tegh-e-Sultan-e-Risalat ki Farishte dekhte the jang mein saulat Muhammad ki

Bhare hain jeb-o-daamaan ne'maton se dono aalam ke Magar dene se bhar sakti hai kab niyat Muhammad ki

Muhabbat rakhte hain Mahboob-e-Haq apne ghulamon se Khuda ko is liye mahboob hai ummat Muhammad ki

Khuda is waaste qaim kare ga bazm-e-mahshar ko Ke dekhein awwalin-o-aakhireen izzat Muhammad ki

Dikhayi apni tezi Aaftab-e-Hashr ne jis dam Ghulaman-e-Nabi par chha gayi rahmat Muhammad ki

Gunahgaro kahan phirte ho sar-gardan idhar aao Tumhari justuju mein phirti hai rahmat Muhammad ki

Jise kehte hain mahshar eid hai woh Ahl-e-Sunnat ki Kabhi dekhein ge Haq ko aur kabhi surat Muhammad ki

Banaye jayen ge mehman ghulaman-e-Rasool Allah Theherne ko mile gi hashr mein jannat Muhammad ki

Na kyun ho naaz qismat par agar is tarah dam nikle Zameen par mera sar ho saamne turbat Muhammad ki

Du'a hai yeh Jameel Qadri ki Haq Ta'ala se Rahe kaunain mein hum par fazoon shafqat Muhammad ki

Ghazal ik aur bhi parh ae Jameel Qadri Rizvi Ke barse jhoom kar huzzaar par rahmat Muhammad ki