Alvida Aye Sabz Gumbad

اَلوَداع اے سبز ُگنبد کے مکیں الفراق اے رَحْمَۃٌ لِّلْعَالَمِیں

اَلوَداع اے مظہرِ ذاتِ خدا الفراق اے خلق کے مشکل کشا

اَلوَداع اے شہرِ پاکِ مصطفیٰ الفراق اے مَہْبِطِ وَحیِ خدا

جارہا ہے اب ہمارا قافلہ اے دَر و دِیوارِ شہرِ مصطفٰی

یاد تیری جس گھڑی بھی آئے گی ہے یقیں دل کو بہت تڑپائے گی

اے دلوں کے چین اے پیارے نبی لو غلاموں کا سلامِ آخری

دُور سے آئے تھے پردیسی غلام عرض کرنے کو غلامانہ سلام

آستانہ سے وَداع ہوتے ہیں اب یہ تو فرماؤ کہ بلواؤ گے کب

چشمِ رَحمت سے نہ تم کرنا جدا رکھنا اپنے سائے میں ہم کو سدا

اے مدینہ والو تم سب خوش رہو دامنِ محبوب میں پھولو پھلو

عرض اتنی ہے مگر اے دوستو یاد ہم کو بھی کبھی کر لیجیو

آخری دِیدار ہے اے زائرو خوب جی بھر کر یہ گنبد دیکھ لو

کیا خبر ہے خوب دل میں سوچ لو پھر مقدر میں ہو آنا یا نہ ہو

یہ کوئی دَم میں چھپا جاتا ہے اب فاصلہ کوسوں ہوا جاتا ہے اب

پھر کہاں تم اور کہاں یہ دوستو دِید آخر کو غنیمت جان لو

ہے دعا سالکؔ کی اے بارِ خدا زندگی میں پھر مَدینہ دے دکھا