Aao Tasbeeh Subh o Sham Karein

Aao tasbeeh subah-o-shaam karein Yun gham-e-zindagi tamaam karein

Har taraf jaan-o-dil bicha deejiye Kya khabar woh kahan qiyaam karein

Chashm-e-tar, soz-e-aarzoo le kar Un ke jalwe ka intezaam karein

Aaj woh puchne to aaye hain Zindagi nazr-e-iqtidaam karein

Aarzoo kaise ho takallum ki Aaj jaan nazr-e-ibtisaam karein

Khwahish-e-bosah-e-qadam ke liye Sang-e-dar tujh se iltihaam karein

Un ka aana tha kuch khabar na rahi Aaj sajda karein qiyaam karein

Phir se Kaabe ki ehtiyaaj na ho Naqsh aisa kuch irtisaam karein

Saqiya! tera maikadah kya hai Bin piye raqs-e-tishna kaam karein

Jur-ah-e-may-e-ma’rifat ke liye Saqi-e-hashr ko salaam karein

Un ke koochay mein sar ke bal ja kar Aao taufe-e-dar haraam karein

Un ki dehleez choomne wale Kaise taqseer-e-istilaam karein

Kooye jaana mein jin ko rehna ho Koshish-e-tark-e-ehtishaam karein

Teri tal’at mah-e-Rabi mein hai Kaise wasf-e-mah-e-siyaam karein

Jal uthay ga yeh aalam-e-hasti Husn jab bhi woh be-niyaam karein

Un ke jalwe zameen ke zarron ko Manba-e-noor-e-samsamaam karein

Un ki zulfen lehar ke mehshar mein Badr ko bhi siyah-faam karein

Nazar kar dein to ’bood’ ho jaye Gar hata lein to phir adaam karein

Tere chehre ki chandni ke shaheed Hashr mein shikwah-e-zalaam karein

Umr sehra mein kat gayi ke kabhi Jalwah-e-rakib-e-sanaam karein

Taab-e-deedar hi na thi phir kyun Shikwah-e-geesoo-e-shamaam karein

Khaimah-e-dil pe teri veerani Pesh-e-aan shahmah-e-khayaam karein

Kya ajab hai woh meherban ho kar Koi shab tere haan qiyaam karein

Jin ko husn-e-azal mein dhalna ho Apne hone ka in’edaam karein

Kaash mit jaye farq-e-sanwiyat Misl-e-qausain inzimam karein

Irtiqa aakhri marahil par Ho to apna safar tamaam karein

Phir man-o-tu ki uljhanon ke liye Aarifo! kyun nuzool-e-taam karein

Download Lyrics & Access Offline - Install Our App Now!

Apni wahdat ko be-karan kar ke Hum bhi kasrat mein inqisaam karein

Koi bijli jala hi de shayad Aao hum Tur par kharaam karein

La-makan tak to ik qadam bhi na tha Is se aage kahin kharaam karein

Tu bhi aa kasah-e-nazar le kar Taake hum lutf-e-deed-e-aam karein

Aa tujhe soz-e-aakhir-e-shab dein Dil tera shahmah-e-namaam karein

Aa ke sirr-e-sukoot de ke tujhe Koh-o-sehra se hum kalaam karein

Aa tujhe daulat-e-ghina de kar Sharq se gharb tak imaam karein

Aa karein tujh pe parto-e-hasti Tujh se roshan juda dar-o-baam karein

Hum to chahein tere zariye se Aa ke hum apna jalwah-e-aam karein

Tu hamein yaad bhi kare na kare Hum tera zikr subah-o-shaam karein

Raaz-e-hasti khule nahi Tahir Matla hi maqta-e-kalaam karein