Sunat Ki Bahar Ayi

سنَّت کی بہار آئی فیضانِ مدینہ میں رَحمت کی گھٹا چھائی فیضانِ مدینہ میں

اِس شہر کے آئے ہیں باہر سے بھی آئے ہیں سرکار کے شیدائی فیضانِ مدینہ میں

داڑھی ہے عِمامے ہیں زُلفوں کی بہاریں ہیں شیطان کو شرم آئی فیضانِ مدینہ میں

لمحاتِ مَسرَّت ہیں دیوانے بڑے خوش ہیں کیوں جھومے نہ ہر بھائی فیضانِ مدینہ میں

سنّت کی بہاروں کا کچھ ایسا سماں چھایا فیشن کو حیا آئی فیضانِ مدینہ میں

اُلفت کے اُخُوّت کے کیا خوب مناظر ہیں گویا ہیں سگے بھائی فیضانِ مدینہ میں

وہ لوگ ہی آتے ہیں اور فیض اُٹھاتے ہیں تقدیر جنہیں لائی فیضانِ مدینہ میں

اپنے ہوں یا بیگانے یوں ملتے ہیں دیوانے جیسے ہو شناسائی فیضانِ مدینہ میں

درد اپنے دلوں میں جو اسلام کا رکھتے ہیں ہے ان کی پذیرائی فیضانِ مدینہ میں

اللہ کرم کر دے تُو بخش دے ان سب کو موجود ہیں جو بھائی فیضانِ مدینہ میں

سنّت کا لئے جذبہ آئے جو یہاں اُس کی ہے حوصلہ اَفزائی فیضانِ مدینہ میں

ابلیسِ لعیں سن لے اب خیر نہیں تیری شامت تری ہے آئی فیضانِ مدینہ میں

فیضانِ مدینہ میں فیضانِ مدینہ ہے فَیضان ہے آقائی فیضانِ مدینہ میں

فیضانِ مدینہ ہی ہے دعوتِ اسلامی فیضان ہے مولائی فیضانِ مدینہ میں

مقبول جہاں بھر میں ہو دعوتِ اسلامی ہر لب پہ دعا آئی فیضانِ مدینہ میں

آقا ہو کرم سب پر بُلواؤ مدینے میں آئے ہیں تمنّائی فیضانِ مدینہ میں

سرکار عطا کر دو غم سب کو مدینے کا جتنے ہیں یہاں بھائی فیضانِ مدینہ میں

قسمت کا سکندر ہے زوروں پہ مقدَّر ہے جس نے بھی جگہ پائی فیضانِ مدینہ میں

آج آقا کے دیوانے کیا مَست ہیں مستانے عطارؔ ہے عید آئی فیضانِ مدینہ میں