Sayah Bhi Mera Chal Nahi Sakta

سایہ بھی مرا چل نہیں سکتا مرے آگے قرآں مرے ہاتھوں پہ ہے آقاؐ مرے آگے

لمحے کی تجوری میں ہیں صدیوں کے جواہر ماضی کی طرح چلتا ہے فردا مرے آگے

پنگھٹ پہ محمدؐ کے کھڑا رہتا ہوں شب بھر پانی بھرا کرتا ہے سویرا مرے آگے

Why Screenshot When You Can Download? Get the App for Efficient Storage!

پڑھتا ہوں تو آنکھوں سے چمٹ جاتے ہیں الفاظ دیباچہء محشر ہے یہ دنیا مرے آگے

جب آپؐ کے رستے کا سفر میں نے کیا ہے دیوار نے بھی رکھ دیا کاندھا مرے آگے

اتنا در سرکار سے سیراب ہوا ہوں دریا بھی نظر آتا ہے پیا سا مرے آگے

تنہا تو نہ تھا میں سفر عشق نبیؐ میں رستہ بھی محافظ کی طرح تھا مرے آگے

امید مرے خوف پہ حاوی ہے مظفر پیچھے ہے مرے موت مسیحا میرے آگے