Sare Nabiyon Ka Sarwar

سارے نبیوں کا سروَر مدینے میں ہے سب رسولوں کا افسر مدینے میں ہے

لُطف جنّت سے بڑھ کر مدینے میں ہے میٹھے محبوب کا گھر مدینے میں ہے

کیا ہوا بھی مُعطَّر مدینے میں ہے سب فَضا بھی منوَّر مدینے میں ہے

کر کے ہجرت یہاں آگئے مصطَفٰے روشنی آج گھر گھر مدینے میں ہے

جانتے ہو مدینہ ہے کیوں دل پسند دونوں عالم کا سرور مدینے میں ہے

سارے دیوانے بیتاب ہیں اِس لئے شاہ کی قبرِ انور مدینے میں ہے

نور کی دیکھو برسات ہے چار سُو کیا سماں کیف آور مدینے میں ہے

ہجرو فُرقت کے بیمار کو لے چلو راحتِ جانِ مُضطَر مدینے میں ہے

دور رہ کر ہے ویران سی زندگی موت بھی کیف آوَر مدینے میں ہے

ہے مدینے کا رُتبہ بڑا خُلد سے کیوں کہ محبوبِ داوَر مدینے میں ہے

مالدارو! نہ اِتراؤ تم مال پر ان کا منگتا تَوَنگر مدینے میں ہے

اپنی منزِل کو پالو گے آجاؤ تم بھولے بھٹکوں کا رہبر مدینے میں ہے

بھول جاؤ گے پیرس کی سب رَونقیں وہ سماں رُوح پَروَر مدینے میں ہے

دشمنو! مت اکیلا سمجھنا مجھے میرا حامی و یاوَر مدینے میں ہے

آؤ عِصیاں شِعارو نہالو یہاں رحمتوں کا سمندر مدینے میں ہے

حشر میں جامِ کوثر کی ہے گر طلب آؤ ساقیِ کوثر مدینے میں ہے

آؤ آؤ گنہگارو آ جاؤ تم شافعِ روزِ محشر مدینے میں ہے

اے شَفاعت کے اُمّیدوارو! چلو شافعِ روزِ محشر مدینے میں ہے

تم شَفاعت میں شک مت کرو زائرو شافعِ روزِ محشر مدینے میں ہے

چل مدینہ وُہی ہو سکے جسکا دل گھر میں رہ کر بھی اکثر مدینے میں ہے

چل مدینہ کا دیوانو! مُژدہ سنو جلد ہر بامقدَّر مدینے میں ہے

سبز گنبد کا عطارؔ منظر تو دیکھ کس قدر کیف آور مدینے میں ہے