Sar Ho Chokhat Pe

سر ہو چوکھٹ پہ خَم، تاجدارِحرم یہ نِکل جائے دَم، تاجدارِحرم

یہ رہا میرا سَر، سینہ قلب و جگر رکھ دو آقا قدم، تاجدارِحرم

حاضِری کا سبب، ہو اے ماہِ عَرب آئیں طیبہ میں ہم، تاجدارِحرم

ہر برس حج کروں ، گردِ کعبہ پھروں یاشہِ محترم، تاجدارِحرم

دیدو خَستہ جگر، کردو شورِیدہ سر اپنا جانِ کرم، تاجدارِحرم

جو کہ بہتی رہے، درد کہتی رہے دیدو وہ چشمِ نَم، تاجدارِحرم

آئیے خواب میں ، قلبِ بے تاب میں سَروَرِ محترم، تاجدارِحرم

کرکے اَطوار ٹھیک، استِقامت کی بھیک دیدو شاہِ حرم، تاجدارِحرم

سب خطائیں مُعاف، اور نامہ ہو صاف پاؤں باغِ اِرَم، تاجدارِحرم

پڑھ لے تحریر جو، اُس کی اصلاح ہو دیدو ایسا قلم، تاجدارِحرم

آمِنہ کے پِسَر ، خیر سے ہوں بَسَر زِیست کے پیچ و خَم، تاجدارِحرم

میرے ماہِ مُبیں جو ہیں اَنْدَوہ گیں ان کے ہوں دُور غم، تاجدارِحرم

حاسِدوں کے حسد، کی نہیں کوئی حد اب تو کر دو کرم، تاجدارِحرم

یانبی تَابکے، ہائے کُفّار کے ہم سَہیں گے ِستَم، تاجدارِحرم

از طفیلِ رضا، ختم ہوں سرورا دشمنوں کے سِتَم، تاجدارِحرم

اے مِرے تاجوَر، دُور ہوں سارے شَر ہو نگاہِ کرم، تاجدارِحرم

ہُوں بڑا رُوسِیَہ، ہے گُنہ پر گُنہ ہو نگاہِ کرم، تاجدارِحرم

کھولو رَحمت کے پٹ، جائے ظُلمت پلٹ ہو نگاہِ کرم، تاجدارِحرم

تیرے عطارؔ کا، ہے یہ ارماں شہا نِکلے طیبہ میں دم، تاجدارِحرم