Rahe Dill Main Jo Yaad Un Ki

Rahe dil mein jo yaad un ki to Nuzhat saath rehti hai Ajab khushbu duroodon ki badaulat saath rehti hai

Jahan jaaun main rehta hoon sada rehmat ke saaye mein Yehi to faiz-e-nisbat hai ke rehmat saath rehti hai

Main tanhai mein rozey ka tasawwur jab bhi karta hoon Usay har baar takne ki woh hasrat saath rehti hai

Mohabbat un se eeman ki jo shart-e-awwaleen thehri To eeman ki hifazat ko mohabbat saath rehti hai

Nazar mein jin ki rehti hain sunehri jaaliyan un ki Unhi ke phir kathan raahon mein himmat saath rehti hai

Koi Siddiq-e-Akbar se wafaon ka sabaq seekhay Kathan raahein bhi hoti hain jo hijrat saath rehti hai

Free Up Space - Get Lyrics Without Bulky Screenshots!

Teri ulfat ke sehra ke musafir ki hai khush bakhti Nahi dikhte sarab us ko, haqeeqat saath rehti hai

Reh-e-haq se to shaitan bhi unhein bhatka nahi sakta Ke jin ke haath mein Quran, shariat saath rehti hai

Aqeedah hai sahi un ka, wahi kamil hain eeman mein Ke jin ke dil mein Tauheed-o-Risalat saath rehti hai

Nahi bat-tay woh firqon mein jo hain un ki ghulami mein Rahein daaman se wabasta to wehdat saath rehti hai

Jaleel aashiq ka putli mein jo dam aata hai us dam bhi Zaban par Kalma-e-Tayyaba to midhat saath rehti hai