Nahi Hain Iss Ke Liye Ashk e Aetazar Bohat

Nahin hain us ke liye ashk-e-aitizar bahut Main kya karoon mira daman hai dagh-dar bahut

Yeh mere dil ki siyahi ko dho nahin saktein Agarcha kehne ko aankhein hain ashk-bar bahut

Huzoor ﷺ aap ka ab samna nahin hota Hoon apni sifla khayali pe sharm-sar bahut

Hai mere dil ko nawahi ki lazzaton ki talab Yeh sach hai, mujh ko awamir hain nagawar bahut

Yeh aur baat hai duniya ke dar se ruk jaaun Nigah-o-dil se to main hoon gunahgar bahut

Main kab hoon huliya-o-uswah mein aap ﷺ ka pairu Yeh jhoot hai ke mujhe aap ﷺ se hai pyar bahut

Instant Access to Thousands of Lyrics - Tap to Install!

Hisab apne ma'asi ka mujh se ho na saka Main raat bhar unhein karta raha shumar bahut

Main hirs-o-aaz ka banda hoon aur yeh kehta hoon Mujhe to hain mere Aqa-e-namdar ﷺ bahut

Mira bharam to hai guftar-e-simiyai se Ba-aitibar-e-amal hoon main kam-ayar bahut

Main teera-bakht faqat naam hi ka Noori hoon Hai aitraf ke main hoon siyah-kar bahut

Jo aap chahein to bakhshish meri bhi ho jaye Huzoor ﷺ aap ko hasil hain ikhtiyar bahut