Meri Har Saans Par

میری ہر سانس پر اُس کی مہر نظر میرے ہونٹوں پر کھلتا ہوا بھی وہی ساتھ بھی اس کے ہوں اس کو طے بھی کروں قافلہ بھی وہی راستہ بھی وہی

راز ہستی اُن آنکھوں سے ظاہر ہوا افتتاح جہاں اُس کی خاطر ہوا خاکداں کے علم اُس کے نقش قدم سدرۂ سدرۃ المنتہا بھی وہی

قول تحقیق ہے فعل تصدیق ہے کیوں نہ ہو علم کا وہ اتالیق ہے اس کا اُمی لقب اور سراپا ادب فلسفی بھی وہی فلسفہ بھی وہی

کتنے لوگوں کا احساں ہے تاریخ پر ایسا انسان کوئی دکھائے مگر سر پہ بار ستم سنگ بستہ شکم ساری دنیا کا فرمانروا بھی وہی

روشنی ازل کا حوالہ بھی وہ مطلع آخری کا اجالا بھی وہ وقت اور فاصلے اس کے محور تلے لامکانی کا جغرافیہ بھی وہی

پوری انسانیت اُس کی ممنون ہے وہ عدالت ہے منصف ہے قانون ہے مصلح ہر زماں بے اماں کی اماں مردہ روحوں کا دارالشفا بھی وہی

فکر ہے عاقبت کی مظفر اگر جس پہ آقا چلے چل اُسی راہ پر جس میں ہوگی رضائے شہ انبیاء حکم صادر کرے گا خدا بھی وہی