Kon Kehta Hai Ankhein

کون کہتا ہے آنکھیں چرا کر چلے کب کسی سے نگاہیں بچا کر چلے

کون اُن سے نگاہیں لڑا کر چلے کس کی طاقت جو آنکھیں مِلا کر چلے

وہ حسیں کیا جو فتنے اُٹھا کر چلے ہاں حسیں تم ہو فتنے مٹا کر چلے

ان کے کوچہ میں منگتا صدا کر چلے رحمتِ حق ہو ہر دم دُعا کر چلے

قصۂ غم سنایا سنا کر چلے جانِ عیسیٰ دَوا دو دُعا کر چلے

رب کے بندوں کو رب سے ملا کر چلے جلوئہ حق وہ ہم کو دکھا کر چلے

مَنْ رَّاٰنِیْ رَاَ الْحَقّ سنا کر چلے میرا جلوہ ہے حق کا جتا کر چلے

جز بشر اور کیا دیکھیں خیرہ نظر اَیُّکُمْ مِثْلِی گو وہ سنا کر چلے

جگمگا ڈالیں گلیاں جدھر آئے وہ جب چلے وہ تو کوچے بسا کر چلے

کیسا تاریک دنیا کو چمکا دیا سارے عالم میں کیسی ضیا کر چلے

کوئی مانے نہ مانے یہ وہ جان لے سیدھا رستہ وہ سب کو بتا کر چلے

کوڑیوں کوڑھیوں کے لیے کوڑھ دُور اچھا چنگا وہ خاصہ بھلا کر چلے

یادِ دامن سے ُمرجھائی کلیاں کھلیں فیض سے اپنے غنچے کھلا کر چلے

شب کو شبنم کی مانند رویا کیے صورتِ ُگل وہ ہم کو ہنسا کر چلے

بد سے بد کو لیا جس نے آغوش میں کب کسی سے وہ دامن بچا کر چلے

جو کمینے تھے ان کو معزز کیا وہ رَذِیلوں کو سینے لگا کر چلے

سب کو اسلام کا تم نے بخشا شرف گرتے پڑتوں کو پیارے اُٹھا کر چلے

اِین و آں اور چنیں و چناں سروَرا تیرے در سے سب اپنا بھلا کر چلے

جس کا ثانی ہوا اور نہ ہے اور نہ ہو وہ عطا کر چلے وہ سخا کر چلے

عمر بھر اَعدا ان کو ستایا کیے اور وہ دشمنوں کو دعا کر چلے

سخت اَعدا کو بھی عفو فرما دیا رحمتِ حق کی شانیں دِکھا کر چلے

جسمِ پُرنور کا یوں تو سایا نہ تھا اور پتھر میں نقشے جما کر چلے

مرتے دم سر درِ پاک پر رکھ دیا اس ادا سے قضا ہم ادا کر چلے

جب قمر اِک اِشارے سے ٹکڑے کیا بولے کافر وہ جادو سا کیا کر چلے

معجزوں کو وہ جادو بتاتے رہے آپ اپنے پہ ظالم جفا کر چلے

جن کے دعوے تھے ہم ہی ہیں اَہلِ زباں سن کے قرآں زبانیں دَبا کر چلے

کَئے صحابی تھے پر تھی یہ ہیبتِ حق گردنیں سارے کافر جھکا کر چلے

اور گردن َکشی کی تو مارے گئے سب نے جانا کہ ظالم خطا کر چلے

جن کو اپنا نہیں غم ہمارے لیے دوڑے جھپٹے وہ پاؤں اُٹھا کر چلے

ابھی میزان پر تھے ابھی پل پہ ہیں پل میں گرتے بچائے بچا کر چلے

سرِ کوثر سنا شور پیاسوں کا جب پہنچے شربت پلایا پلا کر چلے

کسی جانب سے آئیں ندائیں حضور مجرموں کی رِہائی کا کیا کر چلے

دَم میں پہنچے وہ حکمِ رِہائی دیا ان کو دوزخ سے پھیرا پھرا کر چلے

داغِ دِل ہم نے نوریؔ دِکھا ہی دیا دردِ دِل کا فسانہ سنا کر چلے