Khuda Ki Khalk Mein Sab

خدا کی خلق میں سب انبیا خاص گروہِ اَنبیا میں مصطفیٰ خاص



نرالا حسن انداز و ادا خاص تجھے خاصوں میں حق نے کر لیا خاص



تری نعمت کے سائل خاص تا عام تری رحمت کے طالب عام تا خاص



شریک اس میں نہیں کوئی پیمبر خدا سے ہے جو تجھ کو واسطہ خاص



گنہگارو نہ ہو مایوسِ رحمت نہیں ہوتی کریموں کی عطا خاص



گدا ہوں خاص رحمت سے ملے بھیک نہ میں خاص اور نہ میری التجا خاص



ملا جو کچھ جسے وہ تم سے پایا تمہیں ہو مالک مُلکِ خدا خاص



غریبوں بے نواؤں بے کسوں کو خدا نے دَر تمہارا کردیا خاص



جو کچھ پیدا ہوا دونوں جہاں میں تصدق ہے تمہاری ذات کا خاص




Get it on Google Play



تمہاری اَنجمن آرائیوں کو ہوا ہنگامۂ قَالُوْا بَلٰی خاص



نبی ہم پایہ ہوں کیا تو نے پایا نبوت کی طرح ہر معجزہ خاص



جو رکھتا ہے جمالِ مَنْ رَّاٰنِیْ اسی مونھ کی صفت ہے وَالضُّحٰی خاص



نہ بھیجو اَور دروازوں پر اس کو حسنؔ ہے آپ کے دَر کا گدا خاص

Get it on Google Play

midhah-logo-grey© 2025 Midhah