Diyar e Shab Ke Liye

دیارِ شب کے لیے قریہء سحر کے لیے نشانِ پا تِرے ہر ایک رہ گزر کے لیے

درود پڑھ کے پہنچ جاؤں تیرے روضے پر سواریوں کی ضرورت نہیں سفر کے لیے

تلاشِ حُسن میں کیو نکر اِدھر اُدھر بھٹکوں تِرا خیال بہت ہے مری نظر کے لیے

محبّت اپنی جب اس دِل کو بخش دی تُو نے تو ذہن کیوں ہو پریشان مال و زر کے لیے

ہو ناز تیری غلامی پہ جس قدر، کم ہے کہ اس سے بڑھ کے نہیں کوئی تاج سر کے لیے

اگر خُدا کو بھی مَیں تیرا واسطہ دے دوں کبھی بھٹک نہیں سکتی دُعا اثر کے لیے

Get Lyrics On-The-Go! Download Our App Now!

بندھی ہیں جن کی گِرہ میں حضوریاں تیری وُہ دن سنبھال کے رکھّے ہیں عُمر بھر کے لیے

اِسی بہانے مظفّؔر کو تُو نصیب ہُوا کہ آہٹیں تِری درکار تھیں گجر کے لیے